ASLEk ekonomia sozialeko 1.090 lanpostu sortzeko planaren berri eman du (pdf): Europako Gizarte Funtsa baliatuz 218 lan-elkarte berri sortu nahi ditu datozen bost urtetan EAEn. Horretarako 10.000 langabeturekin jarriko da harremanetan, baita titulatu berri diren gazteekin eta birmoldaketak jasan dituzten enpresetako langileekin ere.

Lanzituz, la sozietateak sortuz izeneko proiektuak 2,6 milioi euroko finantzaketa du eta Eusko Jaurlaritzak, EHUk, Gipuzkoako Bazkundeak, Urolako Iraurgi Garapen Agentziak eta CCOO sindikatuak bitartekaritza lanak egingo dituzte.

Elkartearen kudeatzaile Josetxo Hernándezen esanetan plan honen bidez lan elkarteetan diharduten langileen kopurua %16 igo nahi dute, 6.648tik 7.731ra.

Lan elkarteetan, langileak jabe

Lan elkarteak 70eko amaierako industria krisiari erantzuteko hasi ziren ugaritzen. Enpresa askok, ordura arte ezezaguna zen Espainiako Estatuko figura juridiko horri heldu zioten birmoldaketak egiteko alternatiba modura.

Lan elkarteetan –SAL eta SLL akronimoak erabiltzen dira–  langile bazkideek kapital sozialaren gehiengoa dute, eurak dira enpresaren jabe.

Azken urteotako krisiari besteek baino hobeto eutsi diote ekonomia sozialeko enpresok. Gizarte Ekonomiako Euskal Behatokiaren arabera, 2009an 864 lan elkarte zeuden EAEn eta gaur egun berriz 659 dira. Epe berean 7.500 enpresa konbentzional inguruk itxi dituzte ateak erkidegoan.

Nafarroan, berriz, ANEL Gizarte Ekonomiako Enpresen Elkarteak 2013an 40 enpresa berri eta 216 lanpostu sortzen lagundu zuen.