38 urte ondoren, bizirik dirau Zabalzaren oroimenak. Igande honetan gogoratu dute orbaizetarra, Orbaizetako Olan eginiko memoria ekitaldian. Mikel Zabalza Gogoan herri ekimenak, senideek eta lagunek gogoratu dute eta egia, justizia, eta berriz ez errepìkatzeko bermea aldarrikatu dituzte, baita tortura kasu guztien aitortza “premiazkoa” dela eskatu ere. Indarkeria matxistaren aurkako egunaren biharamunean eta osteguneko greba feminista orokorra gogoan, emakumeek sufritutako “zigor bikoitza” salatu dute.

2021eko otsailean izendatu zuen Jaurlaritzak Zabalza biktima gisa, eta Nafarroan, oraindik, auzia aztertzen ari da, beste 300 lagunen torturen lekukotasunekin batera. “Ausardia” eskatu dio herri ekimenak Chiviteren Gobernuari eta bide horretan azaltzen ari diren “kontraesanak” salatu dituzte: “Dokumentu ugari desagertuta daude, edo desklasifikatu gabe. Eta beste adibide bat: aurtengo apirilean Zabalzaren heriotzan inplikatuta dagoen Arturo Espejo Valero guardia zibila teniente general izendatu zuten”.