Albares Espainiako Gobernuko ministroak esan zuen Global Sumud Flotillako kideei emandako tratu txarrak ikertuko zituztela.

Agian hori esan zuenean Marlaska ministroa gela berean zegoen. Cheetos poltsa bat edo agian urdaiazpiko zaporeko patata frijitu poltsa bat irekitzen imajinatuko dut, edo tankera horretako beste huskeriaren bat. Edozer gauza ministroen aisialdirako hor duten kitchenette-an. Kitchenette hitzak, kasu honetan, zuk eta nik dugun vending-makina bezalakoa dela esan nahi du, baina kitchenettean dena doan. Ez horregatik.

Tratu txarrak ikertu egingo direla.

Agian poltsa gehiegi ireki zuen, gehiegizko energiaz, eta Cheetos, Risketos edo patata frijituak atera ziren hegan norabide guztietan. Norabide guztietan, onean izan ezik. Berea. Agian ahoa lehortu zitzaion. Tira, ahoa lehortu zitzaion seguru. Ahoa hainbeste lehortu zitzaion, bi bolatxo hori sortu baitzitzaizkion ezpain ertzetan, txolarre txitei bezala.

Tratu txarrak ikertu egingo dira.

Bi bolatxo hori, baina ez ziren Cheetos edo urdaiazpiko zaporeko patatengatik izan. Denbora gelditu egin zen Marlaska ministroarentzat. Mendea eta segundoa gurutzatzen diren lekuan, denbora gelditu egin zen Marlaska ministroarentzat.

— Nazio Batuetara iritsiko da hori, Nazio Batuen ebazpenei egiten dieten kasuarekin! Eta are gehiago torturak ikertzen dituztenean!— entzun zen ministro jaunaren gogoan. Nekez, barruko ahotsak ere ahoa lehor baitzuen.

Azken Cheetos poltsan segitzen zuen eta hegaz atera gabe zegoen bitartean (edo agian azken patata edo azken Risketos izan zen, dena oso azkar gertatu baitzen), halabehar hutsez, batzuetan pentsamenduak handienetik txikienera doaz eta beste batzuetan txikienetik handienera. Baita ministro baten pentsamenduak ere. Eta ministro horren pentsamendu guztien artean, batek lortu zuen bide bat irekitzea izu-ikara sasien artean: esaldi osoak entzun behar dira.

Albares ministroak esan zuen flotillako kideei emandako tratu txarrak ikertuko dituztela "frogarik badago".

Eta agian une hartan Marlaska ministro jaunak beste patata poltsa bat ireki zuen, trufa zaporekoa, beharbada.

Vicente "Bixen" Carrasco