Giza eskubideen urraketa larria gertatu denaren susmoa zabaltzen ari da Amerikako Estatu Batuetan, Contrainformación.es atariak informatu duenez. Izan ere, migratzaileen kontrolerako zentro batean emakumeak gogoz kontra esterilizatzen direla zabaldu da. Dawn Wooten Aduanen Immigrazio eta Kontrolerako Zerbitzuko erizainak salatu du (Ice ingelesezko siglengatik) praktika horiek Georgiako hegoaldeko Irwin konderriko atxilotze zentroan gertatu direla.

Segurtasun Nazionaleko Departamentuaren menpe dago zentroa, espetxeak kontrolatzen dituen enpresa pribatu baten administraziopean utzita, LaSalle Corrections korporazioaren esku, hain zuzen ere. Wootenek eta euren burua lekuko gisa aurkeztu zuten etorkin batzuek salaketa aurkeztu dute, lau erakunderen babesarekin: Project South, Georgia Detention Watch, Giza Eskubideen aldeko Latindar Aliantza eta Georgia Hegoaldeko Etorkinen Laguntzarako Sarearena, hain zuzen ere.

Wootenek salatu du emakume migratzaileei histerektomia bidezko esterilizazioa egin zaiela, zeinaren bidez umetokia aterarazi egiten dieten. Zenbait lekukok aitortu dutenez, “gizakiekin esperimentatzen duen kontzentrazio-esparrua da”.