Macronen potreta Bardozeko herriko etxetik kendu du Bizik, klima larrialdiarekin duen jarrera salatzeko
Jadanik hamargarren argazki ofiziala da mugimendu ekologistako kideek kendu dutena Ipar Euskal Herrian –Uztaritzen eta Miarritzen gauza bera egin zuten lehenik–. Bardozeko ekintzarekin salatu nahi izan dute COP21ko helburuetatik "deslotu" dela Frantziako Estatua.
aurre egingo dieten hedabide independenteak
G7aren atarian, Emmanuel Macron Frantziako presidentearen irudia herriko etxeetatik eta toki ofizialetatik erretiratzeko kanpainak aurrera darrai eta jadanik ehundik gora dira Frantzian barrena kendutako potretak –Ipar Euskal Herrian hamar–. Azkeneko ekintza Bardozen egin du Bizi! mugimenduak eta Twitterrez zabaldu du momentua, "COP21en helburuetatik deslotzen ari da, guk bere potreta deslotzen dugu!" esanaz:
106. Macron-en potreta Bardoze-eko herriko etxetik kendua izan da goiz huntan. #COP21-eko helburuetatik deslotzen ari da, guk bere potreta deslotzen dugu! 19 bakarrik eskas dira Miarritzeko #G7arentzat behar ditugun 125-ak lortzeko! #LarrialdiKlimatikoa #DecrochonsMacron pic.twitter.com/IdXylnZNTy
— Bizi ! (@bizimugi) 2019(e)ko uztailaren 11(a)
Miarritzeko G7 gailurrerako 125 irudi erretiratzeko helburua du mugimenduak, hain justu egun kopuru hori behar izan du Frantziako Estatuak COP21ek ezarritako bere urteko aztarna ekologikoaren mua gainditzeko. Hala, salatu nahi dute Macronen gobernuak ez dituela beharrezko neurriak hartzen klima larrialdiaren aurrean.
Argazkiak erretiratzeko ekintzak hasi zirenetik hainbat lagun atxilotu eta beste zenbait deklaratzera deitu ditu poliziak, "lapurreta kolektiboa" leporatuta.
