EAJk (10) eta EH Bilduk (9) eserleku bana irabazi dute, eta PSE (3) berdin geratu da. Elkarrekin Podemosek (2) eta PP-C's-ek (1) bana galdu dute.

Portzentajetan, EAJk (ia 2 puntu), EH Bilduk (ia 6) eta PSEk (1) gora egin dute, eta PP-C's-ek (4) behera eta Elkarrekin Podemosek (7) are eta nabarmenago behera.

EAJk irabazi arren oro har (8.000 boto galduz), alderdi nagusi guztiek jaitsi egin dute bototan eta EH Bilduk (6.000 gora) bakarrik irabazi ditu botoak. PSOEk ia 2.000 galdu, PP-C's-ek 16.000 boto galdu eta odoluste itzela Elkarrekin Podemosena izan da, 27.000 boto galduta. Vox ere gogotik nabarmendu da 4.000 botorekin.

Gipuzkoan gaur begiak norbaiten jarrita baziren, hori Ordizia zen. 2016an jeltzaleak gailendu ziren, baina oraingoan EH Bildu aise. Eta beste herri askotan ere bai: Debagoienan Arrasaten, Aretxabaletan, Elgetan eta Bergaran, besteak beste; baita Tolosan, Zumaian, Azpeitian, Pasaian eta Legazpin ere.

Zaldibarko hondamendiagatik interesgarriak ziren baita ere Eibar eta Ermuko emaitzak. EAJ irabazle izan da Eibarren eta PSE hirugarrena (alkatetza du orain). Baina bi alderdiek galera esanguratsuak izan dituzte ia 500 boto galdu ditu EAJk eta ia 300 sozialistek; eta, kontrara, ia 500 irabazi ditu EH Bilduk. Baliteke Zaldibarrek eragina izatea, hor eta beste leku batzuetan ere bai, eta baliteke baita ere beste batzuetan bozka ematera doan adineko boto jeltzalea eta sozialista etxean geratu izana koronabirusaren beldur, eta EH Bildurena fidelagoa agertzea. Eta litekeena da baita ere azken honek Elkarrekin Podemosek bototan izandako galera handi horretatik kopuru esanguratsu bat jaso izana.

Donostian lurraldeko joerak errepikatu dira, bost handienetatik denek galdu dute, EH Bilduk ezik (1.500 boto gora). Voxek lurraldeko ia erdiak bertan lortu ditu.

Carlos Iturgaitzen indarrek behintzat ez dute lortu azken urte luzetan daramaten beherakadari eustea eta barne mailan bizi izandako krisiak gogotik eragin die. Batetik, bere botoaren zati handi bat EAJ ari da xurgatzen aspalditik, eta gero orain Voxek eraman dizkio milaka batzuk (EAEn izan dituen 17.000tik 4.000 Gipuzkoan, hiru lurraldeetatik gutxien boto eta ehunekotan). Hau da, Iturgaitzek ez diola galgarik jarri Voxi, eta inoizko emaitzarik txarrena atera duela Gipuzkoan. Eta beste datu esanguratsu bat, lortutako ia 14.000 botoetatik 7.000 Donostian bildutakoak dira, lurraldean zehar oso gutxi da.

Lurralderik abertzaleena izaten jarraitzen du Gipuzkoak (EAJ + EH Bildu %71), ohi bezala, eta baita ezkertiarrena ere (EH Bildu, PSE eta Elkarrekin Podemos %55).