Lau egun dantzan Pedro Sánchezen dimisioaren bueltan

  • Zer egingo du Sánchezek datorren astelehenean? Dimititu edo jarraitu? Hori da Espainiako Estatuan une honetan bolo-bolo dabilen auzi nagusia. Lau egunotan horretaz besterik ez hitz egitea lortuko du Sánchezek. Eta bide batez Manos Limpias, PP-Vox eta lawfare-ari buruz.


2024ko apirilaren 25an - 12:44

Pedro Sánchezen emazte Begoña Gómezen aurka Manos Limpiasek jarritako ustelkeria eta influentzia-trafiko salaketa onartu zuen Juan Carlos Peinado Madrilgo 41. Instrukzio Epaitegiko epaileak. Manos Limpiasek eskuin-muturreko hainbat hedabidek argitaratutako albisteetan oinarrituta jarritako salaketa onartu zuen epaileak eta auziaren ingurukoak sekretupean jarri zituen asteazken honetan.

Manos Limpiasek berak iragarri du bere salaketa hedabideetan ateratako informazioan oinarritzen dela, baina sindikatuak ez dakiela hori egia den ala ez, eta hori egiaztatzea epailearen lana dela. Faltsutzat jotzen diren akusazioen erantzukizuna gainetik kendu nahi izan du horrela Manos Limpiasek. Epaileak, halaber, ez dio inongo kontsultarik egin fiskaltzari, ikusteko hark salaketari buruz zer iritzi duen. “Faltsuak badira, horiek argitaratu dituzten hedabideen errua izango da, egiazkoak badira auziak jarraitu beharko du”, zehaztu du Manos Limpiasek.

Sánchezen beste jokaldi bat

Manual de Resistencia da Pedro Sánchezek argitaratutako liburu biografikoaren titulua. Ospea ez da alferrikakoa, bere alderdiaren barrutik, eskuin eta eskuin muturretik, esparru judizialetik eta hainbat gunetatik egindako eraso gogorretatik beti erori baita zutik. Horrela, hainbatetan politikoki hilotz jo dena, bere hirugarren legealdian dago. Legealdi oso konplexuan, dena den, bere koalizio gobernua oso sostengu anitzeko plataformaren gainean oinarrituta baitago, eta baldintza horietan gobernatzea ez baitzaio erraza izango, are gutxiago, PP, Vox eta epaile eskuindarrak gainean dituenean.

Inork ez daki zer egingo duen, baina analista askok sumatzen dute hau bere jokaldi konplexu horietako bat dela, eta honekin lortuko duela emaztearen auzian baino, arreta eskuinaren amarrukerian jartzea. Akusatutik biktimara pasatuko dela, alegia. Horrekin Katalunian boto gehiago lor dezakeela ere esaten da, areago bere ezkerrera dauden Sumar eta Podemosen egoera estua ikusita. Kontua da sare sozialetan zabaldutako idazkian arre ala so dioela, eta beraz, gobernuko lehendakaritzan jarraitu edo dimititu egingo duela.

Zein aukerak daude egoera honetan?

Denetik irakurri eta entzuten da: konfiantza mozioa eskatuko dio Kongresuari? Hauteskundeak deituko ditu? Dimititu eta PSOEko beste norbaitek hartuko du gobernuaren lema? Dimititu eta Europar Batasuneko edo mundu mailako erakunde batera jauzi egin? Datorren astelehenean iragarriko du erabakia hedabideen aurrean egingo duen agerraldian.

Manos Limpias: aspaldiko ezaguna euskal lurretan

Podemosekoek gogoratu diote Sánchezi berak baino lehen haiek izan zirela eskuinaren lawfare-aren biktima, eta arrazoi osoa dute. Pablo Iglesias eta Irene Monterok denetarik jasan behar izan dute, lehenago Juan Carlos Monederok edo Alberto Rodríguez ile rastadun diputatuak moduan.

Eta berdin Kataluniako edo Euskal Herriko independentismoek. Lawfaretik tiraka, sinesgaitza da nola eraiki duen bere auzia García-Castejón epaileak Kataluniako Tsunami Democratic mugimenduari talde terroristaren izaera emanda. Gerardo Tecék errepaso esanguratsua egin du Ctxt hedabidean, estatuan azken urteetan lawfare kasu esanguratsuenen bueltan.

García-Castellón epaileren jokaldia makurra bada, askoz makurragoak dira Manos Limpiasek egindako salaketak eta horien ondorioz epaileek irekitako auziak. Euskal Herrian ugariak izan dira: Plazandreak taldea eta Donostiako Udalaren aurka jo zuen, lehenaren aldizkariak argitaratutako hainbat artikuluren harira; ezker abertzalearen manifestazio edo ekitaldi ugariren aurkako debekua eskatu izan du; Javier Balza Barne sailburuaren aurkako salaketa jarri zuen “etakideen omenaldiak baimentzeagatik”; Ibarretxe Planaren aurkako salaketa onartu zion EAEko Auzitegi Nagusiak; Kataluniako ANC legez kanpo uzteko eskaria egin zuen; eta Prestige auziaren bueltan Galizian sortu zen Nunca Mais mugimenduaren aurka ustelkeria salaketa bat jarri zuen.

Legea eta gerra biltzen ditu lawfare kontzeptuak eta azken urteotan barra-barra entzuten da, besteak beste, Hego Amerikako ezkerreko buruzagi ugariren aurka erabili delako, baina, izan, fenomeno oso zaharra da Joaquin Urias epaile espainiar ezkertiarrak iaz idatzirako artikuluan gogorarazten duen moduan: “Izen batekin edo bestearekin beti izan da, eta gainera, saihetsezina da”, dio epaileak.

Espainiako Estatuan, gainera, azken bost urteetan PPk Botere Judizialaren Kontseilu Nagusiaren –justizia organo nagusia da estatuan– berritzea blokeatu du eta horrek zailtzen du lawfare-aren aurkako borroka judiziala. Aferak nazioarteko oihartzuna ere izan du eta, The Guardian-ek, esaterako, bere webguneko azalera eraman du eta artikulu zabala landu du.

 


Kanal honetatik interesatuko zaizu: Espainia
PPk irabaziko ditu hauteskundeak Espainian, PSOEk baino bi eserleku gehiagorekin

Hirugarren indarra Vox izango litzateke,6 eserlekurekin, eta bat gutxiagorekin Podemos. Orain Errepublikak koalizioak Podemosek adina boto eskuratuko lituzke. Emaitzak 23:00etatik aurrera ezagutaraziko dira, orduan itxiko baitira azken hauteslekuak Italian.


2024-05-30 | ARGIA
Amnistia Legea aurrera atera da Espainiako Kongresuan

Ezusterik gabe eta gehiengo osoz onartu dute Espainiako Kongresuan Amnistiaren Legea, txalo artean. Eztabaida laburra izan da, baina tirabiratsua, eta irainak ere entzun dira. 177 aldeko boto jaso ditu legeak eta 172 kontra.


2024-05-23 | Gedar
Palestinaren okupazioak eta Espainiako Estatuko finantza-sektoreak duten lotura seinalatu du ikerketa batek

Ikerketa batek Espainiako Estatuko banketxeen eta enpresen 'greenwashing' praktikak azaleratu ditu. Estatu sionistak lur okupatuetan eginiko eguzki-energia parkeen finantziazioan murgilduta dago estatuko finantza-sistema; BBVA eta Kutxabank ere tartean dira.


BBVA-Sabadell
Bankuak gose: nork gizentzen du piztia?

BBVAk Sabadell irensteko egin duen eskaintza “oldarkorrak” berriz erakutsi digu egungo bankuak nolako azalez eginda dauden. BlackRock eta antzeko inbertsio funts sarraskijaleen atzaparretan erorita, haientzako haratustelak ehizatzen dabiltzan erakunde lotsabakoak... [+]


Zortzigarren polizia infiltratua: bi urte pasatu ditu Madrilgo hainbat mugimendu sozialetan

"Juancar" izenaren pean infiltratuta egon da Carlos P.M. agentea Madrilgo hainbat mugimendutan. 2020an sartu zen Espainiako Polizian, hain justu ere infiltrazio kasu gehiagoren jatorrian dagoen zentro berean egon ondoren. El Salto-k argitaratu du informazioa.


Eguneraketa berriak daude