Kontseiluak deitu du manifestazioa eta bere helburu nagusia da babestea Nafarroako Gobernuko Hezkuntza Sailak zerrenda bakarra ezartzeko hartutako erabakia. Nafarroa da Espainiako Estatuko erkidego bakarra irakasleek bi zerrenda dituztenak funtzionario izateko: batean gazteleraz dakiten irakasleak eta bestean euskaraz dakitenak. Bietan egon nahi badute, bi azterketa egin behar dituzte euskaldunek.

Euskaldunen aspaldiko aldarrikapena da ez daitezela bi egon, bakarra baizik eta herritar bakoitza bere meritu guztiekin lehia dadila horretan. 2015ean ere ahalegindu zen orduko hezkuntza kontseilari Jose Luis Mendoza zerrenda bakarrarekin, baina atzera egin zuen, bereziki UPN, PSN eta hezkuntzako sindikatu batzuek ere gogor egin zutelako asmoaren aurka, bereziki CCOO, UGT eta Afapna.

Orduan, hala ere, orain bezala klabea izan zen Izquierda-Ezkerraren posizioa, oro har Gobernua sostengatu arren, zerrenda bakarraren aurka egin baitzuen. Legebiltzarrean bozketa galtzeko beldurrez atzera egin zuen Geroa Baik. Orain ez, ordea, Maria Solana kontseilariak aurrera egin du, baina Ezkerrak ere bai. PSNk berehala esan zuen lege bat “ad hoc” egitea proposatuko zuela abenduan bertan bi zerrenda egon daitezen legez behartzeko eta Ezkerrak sostengatuko duela iragarri zuen.

Ahal Duguk joan den larunbatean erabaki zuen ez zuela sostengatuko PSNren ekimena; bere ustez ere zerrenda bakarra egon behar da, baina ez orain, trantsizio denbora baten ondoren finkatu beharko litzateke, bestela une honetan funtzio publikora iritsi nahi duten irakasle erdaldunak kaltetuko lirateke.

Iruñeko euskarazko haur eskolak

Eta testuinguru horretan, asteartean ezagutu zen Nafarroako Lurralde Auzitegiak euskarazko haur eskolen aferan emandako epaia: ez da legezkoa Iruñeko Udalak berak kudeatzen dituen haur eskoletan euskarazko plazak handitzeko 2016an egin zuen plana. Zergatik? Funtsean, sortu zuen euskarazko plaza kopuruarekin, eragin handia izan zuelako gaztelaniazko eta ingelesezko ereduetan;   hori ez zelako birmoldaketa sinple bat izan eta, beraz, ez zuela horretarako eskumenik, hori Nafarroako Gobernuaren Hezkuntza Sailak egin behar duela.

Ebazpenak sumina ekarri du Iruñeko euskaltzaleengana, besteak beste aurreko udalak haur eskoletan ingelesezko programei ateak ireki zizkionean ez zelako horrelako inongo ebazpen judizialik egon. Orduan bazen Udalaren eskumenekoa, baina orain ez.

2016ko uztailean ere, Kontseiluak deitutako manifestazioa egin zen Iruñean, Gobernuak euskararen esparruan hartutako erabakiak babestuz eta ausartagoak eskatuz.