2020ko maiatzaren 31
Pirinioen bi aldeetan dauden interpretazio zentroen Patrim sareak mendikatearen ondare komuna balioetsi nahi du. Artisten egonaldiak bultzatuko dituzte Europako lankidetzarako diru-laguntzak baliatuta.
Denera nazioarteko 42 artista eta kolektibo aurkeztu dira uda honetan Pirinioetako interpretazio zentro eta museotan erresidente gisa aritzeko deialdira. Patrim+ proiektuaren baitan, Couseransen (Ariéja, Okzitania), Grausen (Ribagorza, Huesca) eta Ezkioko Igartubeitin (Goierri, Gipuzkoa) egingo dituzte egonaldiak aukeraturiko artistek. Irabazleen berri apirilaren 29an emango dute.
Egonaldiekin, zentro horiek dauden lurraldeen eta sorkuntza-prozesuen arteko topaketa erraztu nahi dute, presentzia artistikoa sendotuz.
Lehen aldia da ondarearen interpretazio zentro, museo eta ekomuseoen halako sare bat osatzen dela gure mendikatearen mugaz gaindi: “Pirinioak inoiz ez dira izan irmo itxitako muga, denbora luzez kultura, gizarte eta ekonomia arloko elkartrukeen lurralde handi bat baizik”, azaldu dute Igartubeiti museoko arduradunek.
Patrim+ proiektuaren barruan hitzaldi eta jardunaldiak ere antolatu dituzte. Ekainaren 6an eta 7an Lleidako Pirinioetan dagoen Esterri D’Àneu herriko ekomuseoan, tokiko ondare eta museoen erronken inguruan arituko dira; Europako hainbat bazterretatik etorritako unibertsitateko adituek hitz egingo dute bertan.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
