Kukutzako mobilizazioetako hemezortzi atxilotu absolbitu dituzte, eta bat zigortu
Lau hilabeteko espetxe zigorra ezarri diote zigortutako gazteari. Beste pertsona bat hiru urteko espetxe zigorra jasateko arriskuan dago, Kukutzarekin Elkartasun Taldeak (KET) gogorarazi duenez.
KET taldeak baloratu du sententzia Zirika Herri Gunean egindako agerraldian, Bizkaiko Lurralde Auzitegiak erabakia iragarri eta astebetera.
Hemezortzi atxilotuak iazko irailean epaitu zituen Bilboko Hirugarren Zigor Auzitegiak. Bederatzi hilabeteko zigorra jarri zioten auzipetu bakoitzari “desordena publikoa” egotzita, eta 84.000 euroko kalte-ordaina.
Helegitea jarri zioten sententziari, eta erabakia atzera bota du orain Lurralde Auzitegiak. Atxilotutako hemeretzi lagunetatik hemezortzi absolbitu egin ditu, eta bati lau hilabeteko espetxe zigorra ezarri diote.
“Manifestazio eskubidea gauzatzeagatik” atxilotu zituzten hemeretzi lagunak, Elkartasun Taldeak salatu duenez. Epaiketan parte hartu zuten ertzainen testigantzak “kontraesankorrak” izan zirela gehitu dute, eta adierazi dute atxilotuen funtsa “ahulenekiko ausazko erasoa” izan zela.
Ez da azken kasua
Ez dira Kukutzaren aldeko mobilizazioen harira auziperatutako bakarrak. 2015eko urtarrilean beste 23 lagun epaitu zituzten usurpazio delitua leporatuta; 22 absolbitu egin zituen epaileak. Bati, ordea, hiru urteko espetxe zigorra ezarri zioten atentatu delitua egotzita.
Helegitea jarri zioten sententziari eta erabakiaren zain daude orain. Dena den, orain arteko epaiketa guztietan auziperatutako guztiak absolbitu dituzte, eta hura ere absolbitzea espero dute.
Uriola.eus hedabideak prentsaurrekoaren bideoa egin du
2011ko irailaren 21a ez dute Bilboko Errekaldeko auzotarrek erraz ahaztuko. Munduko alkaterik onenaren saria irabazi zuen Iñaki Azkuna jeltzaleak bidalitako hondeamakin eta ertzain saldoak eraitsi zuen Euskal Herriko gune autogestionatuetako ikurretako bat. Kukutza III... [+]
Batere jakin gabe Bilboko Azkuna Zentroak 200 euro eman zizkion azaroaren 12 honetan Kukutza defendatzeagatik auziperatuak izan ziren lagunei.
Bilboko auzitegiak bederatzi hilabeteko kartzela zigorra ezarri die hemeretzi gazteri Kukutzaren eraisketaren aurkako manifestazioan “desordena publikoak” eragitea leporatuta. Kartzela zigorraz gain 84.000 euroko kalte ordainak ordaindu beharko dute.
Astelehenean hasi da Bilbon Kukutza defendatu zuten 19 gazteren aurkako epaiketa. “Desordena publikoa” eta “erresistentzia” leporatuta, urte eta erditik bi urte eta erdirainoko zigorrak eskatzen dizkie fiskaltzak.
Bilbon eta Donostian mobilizazioak eginen dituzte larunbatean gaztetxeen alde. Deialdi bateratua egin dute Kukutzako 19 auzipetuei eta desalojo arriskuan den Kortxoeneari babesa adierazteko.