Klima gehien kaltetzen duten zortzi euskal enpresetatik lau erraustegiak dira

  • Zabalgarbi erraustegiarekin batera Arrigorriagako Cementos Rezola, Lemoako Lemona Industrial eta Donostiako Cementos Rezola daude Euskal Herrian negutegi eragineko gas gehien isurtzen dituzten zortzi fabrika kutsatzailenen artean. Lauak ari dira gaur egun, Eusko Jaurlaritzaren baimenez, hiri hondakinak erretzen.

Zero Zabor @zero_zabor
2019ko irailaren 20a
EAE eta Bizkaiko agintariak Zabalgarbi erraustegiaren 10. urteurrena ospatzen 2015ean. (Argazkia: Zabalgarbi)

Berria egunkarian Iñaki Petxarromanek eskaini ditu datuok Kutsaduraren erraldoiak kronikan, enpresa bakoitzaren kokapen geografikoa eta datuak ulertzea errazten duen grafiko interaktibo batez osatuta. Espainiako PRTR erregistro ofizialak –enpresek ingurumenean airean bezala lurzoruan eta uretan isurtzen dituzten kutsagaien neurketa aitortua biltzen dituenak– eskainitako datuak erabili ditu Euskal Herriko 15 enpresa kutsatzaileen rankinga osatzeko; horietan, zortzi kutsatzaileenetatik lau hondakinak kiskaltzen ari diren erraustegi eta porlan-fabrikak direla nabarmentzen da.

Fabrikarik kutsatzaileena Bizkaiko Petronor da eta bere jabea Repsol da, zeinaren buruzagi nagusia Josu Jon Imaz baita. Beste hainbat kutsagaiz gain, Petronorrek 2017an 2,204 milioi tona CO2 isuri zituen PRTRren arabera. Bigarren kutsatzaile handiena Zierbenako Bahia de Bizkaia zentral termikoa da eta negutegi eragina duten gasen artean gehien aipatzen den CO2-tan isuri zituen 469.000 tona. Rankingean hirugarren Sestaoko Edar Galindo araztegia dator eta laugarren Zabalgarbi: 273.500 tona CO2. Bostgarren Arrigorriagako Cementos Rezola: 364.555 tona CO2. Seigarren Lemoako Lemona Industrial (lehen Cementos Lemona) soilik CO2tan urtean 484.800 tona isuriz. Zazpigarren Iurretako Smurfit Nervion paper fabrika eta zortzigarren Donostiako Añorgan Cementos Rezolak daukan porlan-fabrika, 2011n 445.936 tona CO2 aireratuta (antza, PRTRk ez du bildu oraindik honen 2017ko daturik).

Udazken honetan Gipuzkoan –Añorgako zementu-fabrikatik oso hurbil– piztekotan diren Zubietako erraustegia, oker handirik ez bada, PRTRko 2020ko erregistroetan Euskal Herriko 15 kutsatzaileenen artean sartuko da, hondakinak erretzen dituzten lau usina horien uberan.

Ingurumenaren kutsaketan eta klimaren aldaketa eragiten duten gasen isurketan txapeldunak diren euskal enpresa guztiok biltzen dituen patronalak Aclima du izena, osorik esanda Aclima Basque Enviroment Cluster.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Larrialdi klimatikoa  |  Kutsadura  |  Errausketa

Larrialdi klimatikoa kanaletik interesatuko zaizu...
Azkenak
EGILEA
Eguneraketa berriak daude