ARGIA.eus

2021eko urriaren 22a

Klima aldaketak ekarriko duena

  • Azken urteotan klima aldaketaren arazoa gero eta larriagoa dela entzun da behin eta berriz, eta gero eta kontzientziatuago dago gizartea aldaketa horrek suposatuko duenaz. Aditu asko ordea, ez dago klima aldaketarekin hain konbentzituta, nahiz eta ikerketa ugarik argi azaldu duten atmosferako zein ozeanoetako tenperaturak igo egin direla azken urteotan.

2008ko otsailaren 09a
Warming Island

Baina dagoeneko, hainbat gertakari azaleratu dira eta adituen mezuetan behin eta berriz entzun diren ideiak dagoeneko eguneroko errealitatean nabari direla dirudi. Neguan tenperaturak epelagoak dira, eta euri gutxiago egiten du, adibidez.

 

Dena den, tenperatura aldaketa hauek normalak izan daitezkeela diote zenbait adituk, klimak berezko fluktuazioak izaten baititu behin baino gehiagotan. Planetako klima aldatzen ari al den jakin ahal izateko ordea, oraindik ere ikerketa asko egin behar direla azaldu dute hainbat zientzialarik.

 

Ikerketa sakonago eta luzeagoak egin behar badira ere, hainbat eredu matematikok gizakion eraginez klima berotu, eta berotze-prozesua bizkortu egin dela ondorioztatu dute.

 

Klima beroagoek, beste aldaketa askoren artean, goi-latitude eta mendietako izotzen urtzea ekarriko lukete eta honekin batera itsas mailaren igoera, itsasoek hainbat hiri eta populatutako kostalde urperatuko lituzketelarik. Honek populazio-migrazio handiak eragingo lituzke, arazo politiko eta ekonomiko neurtezinez gain. Izotz kapeluak eta glaziarrak urtzeak lurrazalaren albedoa jaitsiarazi eta ondorioz lurrazala berotuko litzateke.

 

Azken ondorio horri eutsiz, Groenlandian adibidez nabari da dagoeneko klima aldaketa: Zirkulu Polar Artikotik 640 kilometrora irla berri bat aurkitu zuten 2005ean. Antza denez, irla horren inguruko izotza urtu den arte inork ez zekien irla bat zenik eta Warming Island (Beroketa Irlaren inguruko bideoa) bezala bataiatu dute. Adituek azaldu dutenez, hemendik aurrera eta klima aldaketaren eraginez, gero eta irla gehiago agertzen joango dira Groenlandian, eta itsasoaren maila ere zientzialariek aurreikusi baino askoz azkarrago igoko dela diote.

 

Klima aldaketak turismoa aldatu du

 

Klima aldaketak turismo ohiturak ere aldatuko omen ditu, eta badirudi dagoeneko antzematen dela. Groenlandiako Warming Island irla berezia bisitatu eta bertatik bertara klima aldaketaren ondorioak ezagutu ahal izateko adibidez, bidaia bereziak antolatzen dituzte Betchart Expeditions eta Tasermuit bidaia agentzia amerikarrek. Bidaiak barkuz egiten dira eta 3.700 eurotik 5.100 euro arterako prezioa dute. Gainera, izotza urtzearekin batera, irlako bisitarien kopuruak ere gora egin du, hala urtean 200 bisitari eskas izatetatik 400 izatera pasa da azken urtean.

 

Agentzia hauez gain, badirela antzeko burutazioak izan dituztenak eta aldaketa klimatikoari nolabaiteko etekina atera nahi izan diotenak. Ez dira berriak Perito Moreno (Argentina) glaziarrera egiten diren txangoak, izotz zatiak ozeanora nola erortzen diren ikusteko. Eta baita Norvegiako fiordoak poliki-poliki nola desagertzen diren ikusteko egindako irteerak ere.

 

Hala ere, ez dago Groenlandiako edo Patagoniako glaziarretaraino joan beharrik klima aldaketak turismoan duen eragina ikusteko. Espainiar estatuan adibidez, dagoeneko hasi dira nabaritzen klimaren aldaketak turismoan duen eragina. Kanariar Uharteetako ostalariek diotenez, nabari da bisitarien kopurua gutxitzen ari dela. Orain arte hain ugariak ziren bisitari europarren kopurua gutxitzen ari baita, beraien herrialdeetako klima ere epeldu egin delako. Eta irlara joaten diren bisitarien estantzia ere egun gutxiagokoa dela diote.

 

Eski estazioen arduradunak ere kexu dira, gero eta elur gutxiago baitago; eskiatzaileen kopurua murrizteaz gain, enpresarien diru-sarrerak ere gutxitzea dakar horrek.

 

Beraz, klima aldaketak naturan sortzen dituen ondorioekin batera, bestelako eraginak ere baditu eta dagoeneko nabariak dira gure gizartean.

 

Lotura interesgarriak

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Groenlandia  |  Argentina

Groenlandia kanaletik interesatuko zaizu...

Azkenak
Argia buletina
Egunaren laburpena
zure e-postan
Eguneraketa berriak daude