Manuel de Iradier eta Foru kaleen artean kokatua zegoen plaka, zeinak metro gutxitara zegoen kartzela frankistan egondako emakumeak oroitzen zituen. Spray beltzarekin zirriborratu dute, bertan jartzen zuena irakurtzea eragotziz.

Oroimen historikoa berreskuratzeko Gasteizko Udalak azken hilabetean jarritako plaketako bat da kaltetutakoa, baina ez erasoak pairatu dituen bakarra. Maiatzean, frankistek Santa Isabel hilerrian fusilatutako 33 lagun omentzen zituen beste plaka bati ere egin zioten eraso.

Mugimendu memorialistaren ikuspuntua

Gasteizko Udalak ‘Memoriangune’ bezala izendatutako plaken inaugurazioetan ez du parte hartu Frankismoaren Krimenen Aurkako Euskal Plataformak. Are gehiago, haserre agertu da Udalaren Memoria Historikoaren Planarekin. Ideiaren izatezko sustatzailea den plataformak kritikatu duenez, planak ez ditu aintzakotzat hartzen hasiera batean xedatu zituzten lau helburuak: egia, justizia, konponketa eta berriz ez gertatzea, alegia. Informazio panelak jarri arren, Gasteizko Udalak diktadura frankistako apaiz, militar eta autoritateen kale izenak ez kentzea erabaki zuen. Plataformak ez du begi onez ikusi erabakia.