ARGIA.eus

2020ko abuztuaren 08a

Jaurlaritzako Hezkuntza Sailaren gestioa kritikatu eta datorren ikasturterako eskaera zehatzak egin dituzte irakasleek

  • Sinadura bilketa abiatu du Gasteizko irakasle talde batek, COVID-19ari lotuta Eusko Jaurlaritzak hezkuntza arloan egin duen gestioa kritikatuz eta irailetik aurrera argibide zehatzak, hezkuntza komunitatearen parte-hartzea eta baliabideak eskatuz. Ildo berean idatzi du Lasarte-Oriako beste irakasle talde batek.

Mikel Garcia Idiakez @mikelgi
2020ko uztailaren 02a

Hezkuntza modu telematikoan egiteko baliabide eta plangintzarik ez dutela ikusi kexatu dira Gasteizko irakasleak. Aldiz, ordezko irakasleen kontratazioa eten zuela Jaurlaritzak. “Lanean jarraitu genuenok eskura genituen baliabide guztiak erabili ditugu hezkuntza eskubidea berma zedin: ordu gehigarriak, egokitzapenak, telefono eta baliabide digital propioak,  premia berezietara eta etxeko egoeretara moldatzea... Eta hala ere gobernu-buru diren zenbaiten mezu iraingarriak jaso behar izan ditugu, ‘gainontzekoak bezala berriz lanean hasi beharko dira’, besteak beste”.

Jaurlaritzatik ikastetxeetara bueltatzeko deia egin zenean ere, plangintza zehatzik ez zela egin salatu dute, eta osasun plangintzak langile eta zuzendaritza taldeen bizkar utzi zirela. “Baliabide faltaren aurrean, gure etxeko ordenagailuak eta telefonoak eskolara eramateko proposatu ziguten. Ez al dira nahikoak hiru hilabete itzulera baten planifikazioa aurreikusteko?”.

Ratioak erdira, ganorazko baliabideak eta komunitate osoaren parte-hartzea

Berriz ere halakorik errepika ez dadin, proposamen zehatzak egin dituzte Gasteizko irakasleek. Ordezkagunea (ordezko irakasleak kontratatzeko sistema) normaltasunez berriz martxan jartzea; ratioak erdira jaistea; hezkuntza premia bereziei aurre egiteko irakasleen kontratazioa suspertzea; ganorazko baliabideak aurreikustea eta bermatzea (ordanagailuak, gela gehigarriak, espazio irekien erabilera eta giza baliabideak); hezkuntza telematikoa bermatzeko behar diren baliabideen proposamen argia, “langile eta familiak artatzeko eta arrakala digitala ekiditzeko”; erakundeen aldetik ahalik eta argibide gehien jasotzea; eta erabakietan hezkuntza komunitateko kide guztien parte-hartzea gauzatzea.

“Ez digu balio sailburuaren aldetik inolako planik proposatu gabe eskolara itzultzeko agintzeak. Ez digu balio ikastetxeak irekitzeko erantzukizuna eta zama epidemiologia kudeaketa bat diseinatzeko prestaturik ez dauden zuzendaritza taldeen eta langileen gain jartzeak berriz ere”.

Kritika eta eskaerekin ados egonez gero, lotura honetan eman dezakezu atxikimendua.

Neurri zentzugabeak eta eztabaidatu gabeak

Ildo berean, COVID-19ak aurretik bizi zuten egoera bat areagotu duela salatu du Lasarte-Oriako Oriarte BHI ikastetxeko irakasle talde batek: “Orokorrean, exijentzia geroz eta handiagoak, eta ikusten ez diren betebeharren hazkuntza –batez ere zeregin administratiboak–, giza eta material baliabide urriekin, gure benetako zereginaren kaltean: irakatsi”.

Pandemia egoeran, administrazioak neurri zentzugabeak hartu dituela kritikatu dute, irakasleen gaitasuna eta erantzukizuna auzitan jarri dela, egoera berezi honetan eskola nola kudeatu erabakitzeko orduan ez dela hezkuntza komunitatearen iritzia aintzat hartu eta informazioa hedabideetatik heldu zaiela hainbatetan. “Zuei, gizartearentzat hain garrantzitsua den Hezkuntzaren moduko alorreko kudeatzaileak zareten horiei, irakasleen rola balioan jartzea dagokizue, eta hein handi batean, osasun alarma honetan halakorik ez duzuela egin pentsatzen dugu. Ez dugu onespen eta aintzatespenik behar, baina ezinbesteko deritzogu ingurugiro egoki eta gutxieneko plangintza bat eguneroko lana berme osoekin aurrera eraman dezagun eta ikasleek kalitatezko hezkuntza jaso dezaten”.

“Babes instituzional tinkoa espero dugu”

Gasteizko irakasleen moduan, hurrengo ikasturterako kezka agertu dute Lasarte-Oriakoek ere. Eskatu dutena: baliabide eta formazio teknologikoa, ikasle ratio arrazoizkoak, irakasle kopuru egokia, eta aurrez aurreko lanari lehentasuna online lanaren kaltean, lan karga biderkatu ez dadin. “Eta batez ere –diote–, babes instituzional tinkoa espero dugu”.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Hezkuntza  |  Covid-19 shockean adi

Hezkuntza kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude