“Otsailaren 12an Parisko Asanblada Nagusian legea eztabaidatzen hasi zirenetik, istilu asko egon da Frantziako kaleetan gai honen inguruan”, dio idazleak. “Homosexualak eta horien aldeko politikari nahiz herritarrak plazara ateratzera bultza ditu gai hau azaleratzeak; baina homofobia ere modu desorekatu batean hazi da, eta batzuen eta besteen manifestaldi asko gatazkekin amaituak izan dira”.

“Betidanik sexu berekoen ezkontzaren aurka agertu diren alderdi politikoetako kideek hedabide neoliberalak erabili dituzte gizartean biktima gisa azaltzeko” adierazi du. Frigide Barjot humoristaren paperak ere homofobia hauspotzeko balio izan duela azaldu du. “Jakinda, gainera, Karl Zero kazetariaren koinata eta Le Penen laguna dela, eskuineko sinestun horiena alegia, litekeena da bere diskurtsoa plazak homofobiaren aldekoek okupatzera bideratua egotea”.

Legeak onartua izateko duen aukera handiaren aurrean pozik agertu da Borda. Hala ere, “beharbada 2017az geroztik, eskuinak berriz ere boterea eskuratzen duenean (eta menturaz izanen da), kontseilu konstituzionalera eramango dute lege hau berriz ere, deuseztatzeko asmoz”, esan du kezkaturik.

Homosexualitatea Frantziako kaleetan gero eta gai irekiagoa den arren, pertsona publiko homosexual gehienak gizonezkoak direla aipatu du idazleak. “Lesbianak ia ikusezinak dira. Badaude gutxi batzuk, politikariren edo musikariren bat, baina Frantzian oraindik zaila da homosexual gisa agertzea ghettoetan ez bada”.

Euskal Herrian dagoen homosexualitatearen egoeraz mintzatu da ostera. “Hemen ez dugu beharrezko ikusten gai horiei buruz publikoki hitz egitea. Baina Audre Lorde poetak esan bezala, ‘isiltasunak ez zaitu salbatu’; eta uste dut Euskal Herrian eta euskaraz ere homosexualitateari buruz isilik mantentzeak ez gaituela salbatzen”.

“Uste dut garrantzitsua dela ‘lesbiana naiz’ edota ‘gay naiz’ normaltasunez esatea, bai familiari, bai lagunei, baita lan munduan ere” gaineratu du. “Eta uste dut alde horretatik gayen arteko ezkontza baimentzeak halako normaltasun bat jarriko duela gure harremanetan, Euskal Herrian barne”.