Ipar Euskal Herriko Hitza astekariak hamar urte bete ditu. Hain zuzen, joan den azaroaren 5ean izan zuen hamargarren urteurrena, baita Nafarroako, Gipuzkoako eta Bizkaiko Hitzek ere. BERRIA Taldeak sortutako astekariak dira, eta beti argitaratu izan dira ostiraletan; Nafarroakoaren eta Ipar Euskal Herrikoaren kasuan, zortzina orrialdekoak, eta beste bienean, hamaseinakoak. Araban ez dago Hitza-rik; han, Alea astekaria dago, eta bertako bazkideetako bat da BERRIA Taldea.

1990etik aurrera daude kazeta nazionalak —Euskaldunon Egunkaria eta BERRIA—, eta eskualdeetakoei 2001ean ekin zien hedabide taldeak, tokiko eragileekin elkarlanean, Tolosaldean Egunero sortuta —2003an, Egunkaria-ren itxieraren ondoren, Tolosaldeko Hitza izena hartu zuen—. Komunikazio proiektua osatzeko sortu zituen, orain hamar urte, herrialdeetako euskarazko astekariak.

Hamar urteko ibilbidean Lapurdiko, Baxenabarreko eta Zuberoako aktualitateko gai andana bat aipagai izan ditu Hitza-k; horren adierazgarri dira 2010eko azaroaren 5eko azalaz geroztik artxiboetara pasatu diren beste hainbat: AHTaren xedea, mugimendu feminista, hizkuntza eskubideak, bake prozesua, arazo ekologikoak, gai ekonomikoak eta mugimendu sozialak, gazte mugimenduak, Euskal Elkargoaren sortzea, kultura…; zerrenda osoa luzeegia litzateke aipatzeko.

Astekariko Iritzia sailak ere bidea egin du, Eleketa saileko gutun truketik marrazkietara jauzi egin baitzuen joan den urtean. Interneten ere, bestalde, presentzia bermatu zuen Ipar Euskal Herriko Hitza-k, sortu ondotik webgunea sareratuz eta gaur egun zenbait sare sozialetatik edukiak partekatuz.

Azkeneko urteetan, Euskal Hedabideen arteko elkarlanek ere isla ukan dute astekari honetan.