Hector Llaitul militante maputxea atxilotu dute Txilen
Wallmapuko CAM Arauco-Malleco Koordinakundeko buru da Llaitul, eta egurra lapurtzea, lurrak indarrez kentzea eta estatuaren aurkako atentatua egitea leporatzen diote. Asteazken honetan, abuztuaren 24an, atxilotu dute.
Txile hegoaldeko Cañete herrian atxilotu du Txileko Poliziak CAM Arauco-Malleco Koordinakundeko buruzagi Hector Llaitul. Aspaldiko militantea da, maputxeen eskubideen eta autodeterminazioaren alde borrokan dabilena. 2007an jadanik, "lurrik ezean, maputxeen nortasuna berreraikitzerik ez dago" adierazten zion ARGIAri eskainitako elkarrizketan. Garaian, preso zuten jadanik eta gose greban zebilen.
Abuztuaren 24 honetan burutu dute bere atxiloketa, jatetxe batean zegoela. 2020an abiatu zuen Llaitulen aurkako ikerketa Sebastian Piñera garaiko presidenteak, martxotik geroz presidente den Gabriel Boricek jarraiturikoa. Egurra lapurtzea, lurrak indarrez kentzea eta estatuaren aurkako atentatua egitea leporatzen diote.
Atxiloketaren berri ukan bezain laster, lotu dira kale borrokari bere aldeko batzuk. "Maputxeen aurkako errepresioari stop. Hector Llaitul eta maputxe preso politiko guztientzako askatasuna orain" leloa lehen lerroan jarri eta manifestazioak ere egiten dabiltza. "Ezaguturiko muntaia absurdoena" salatu du bere bikote Pamela Pezoak.
Guillermo Camus Jara izena du eta Txileko Lebuko kartzelan dago. Egoera larrian da, gose greba luzeaz gain, ostiraletik egarri grebari ere ekin baitio.
Maiatzean ekin zioten gose grebari 17 preso politikok. Haien eskubide kultural eta territorialak errespetatzea, lege antiterrorista bertan behera uztea, Lanaren Nazioarteko Erakundearen 169 hitzarmena onartzea eta preso politiko maputxeen askatasuna exijitu dituzte.
Norvegiako berriztagarrien erraldoiaren hainbat proiektuk ondoeza eragin dute maputxe eta sami herriengan. Epaileek ere ilegaltzat jo dituzte azpiegiturak, baina gobernuek ez ikusiarena egiten dute. Giza eskubideen aldeko aktibista ospetsuek ere bat egin dute protestarekin,... [+]
