Gure Esku-k ‘Herri libre bat’ dinamika aurkeztu du

  • Datozen bi urteetako erronken berri eman du erabakitze eskubidearen aldeko ekimenak larunbatean Bilboko Kafe Antzokian. “Herri libre bat nahi dugu, mugimendua sortu nahi dugu, herria martxan jarri eta elkarlana bultzatu nahi dugu”, adierazi dute.


2024ko martxoaren 04an - 11:13
Azken eguneraketa: 13:05

Herri libre bat dinamika aurkeztu du Gure Eskuk, eta adierazi du subiranotasunaren auzia agenda politikoaren erdigunean ezartzea izango duela helburu. “Herria ilusiotik mugituko dugu”, adierazi du Josu Etxaburu bozeramaileak. Sinergien beharra azaldu du: "Une hau egokia dela uste dugu, hainbat mugimendu gertatzen ari baitira gure inguruan”.

Aurrerapausoak emateko beharra dagoela esan dute agerraldian, "herri gisa erronka handiak daudelako", eta erantzun egokiak emateko baliabide berriak behar direlako. Bestetik, adierazi dute "Euskal Autonomi Erkidegoaren, Nafarroako Foru Erkidegoaren eta Ipar Euskal Herriko Elkargoaren egituraketaren etorkizunari buruzko gogoeta eta eztabaidak zabalik ala zabaltzen bidean" daudela. Baita eragile politikoen artean lankidetza formula berriak martxan daudela ere.

Irantzu Perello Gure Eskuko kideak azaldu du herri libre bat izatea ez dela amets bat, ezta eskaera bat ere: “Herri libre bat izatea egunez egun eraikitzen eta gauzatzen den borondate bat da. Urratsez urrats, erabakiz erabaki lortzen den helburu bat”.

Hamar urte lehenengo herri galdeketatik

Apirilaren 13an hamar urte beteko dira lehen aldiz Euskal Herriko herri batek, Etxarri Aranatzek, estatus politikoari buruzko herri galdeketa bat antolatu zuela. Herri galdeketen lehen mugimendua izan zen, lehen harria, eta hortik aurrera Gure Eskuk Euskal Herrian beste hainbat herri galdeketa bultzatu zituen. Herritarrek bozketak antolatu ziren, eta 208 herritan 218.000 lagunek hartu zuten parte. Hamar urte geroago, herri galdeketa egin zuten herri guztiei aitortza egiteko topaketa antolatu du Gure Eskuk Etxarri Aranatzen, “Bozka bidez gure etorkizuna erabakitzearen beharra ortzi-mugan kokatuz”.

Herri libre bat dinamikaren lerro nagusiak aurkeztu dituzte Kafe Antzokian. Gure Eskuk antolatutako ekimenekin batera, beste eragile batzuek antolatuko zenbait ekimen aipatu dituzte, haietan parte hartzeko deia egin nahi dutelako. 

  • 23. Korrika
  • Aberri Eguna
  • Maiatzean, Euskal Herriko lurralde ezberdinak lotuz, martxan gaudela erakustea xede izango duen ekimen bat egingo dute.
  • Ekainean, 2025erako mugarriak azalduko dituzte.
  • Azaroan, zazpi lurraldeetan zehar herritarren sormenari esker, herria hamabi orduz iraungo duen ikuskizun batean bilduko dute.
  • 2025eko udaberrian, lau haizetara zabalduko dute “Euskal Herriaren aniztasuna, indarra, ilusioa eta gogoa”.

Kanal honetatik interesatuko zaizu: Gure Esku
Espainiako Vueltan errepideak euskal ikurrez betetzeko deia egin dute astebururako

Gure Esku eta Nafarroa Berriz Altxa elkarteek ekimenak antolatu dituzte lasterketa Euskal Herritik igarotzen denerako. "Euskal Herriaren erabakitzeko eskubidea" aldarrikatu eta "muga artifizialak" auzitan jarri nahi dituzte, besteak beste.


"Popatik hartzera" bidali ditu ertzain batek hiru lagun, euskaraz aritzea eskatzeagatik

Hiru emakume euskaraz zuzendu zitzaizkien ertzain batzuei, jatetxe batengatik galdezka. Polizietako batek erantzun zien euskaraz bazekiela baina ez zuela erabiliko, eta "popatik hartzera" bidali zituen. Ertzainari plaka eskatu zioten orduan, eta poliziak erdiko hatza... [+]


2023-06-20 | Hala Bedi
Trebiñuren erabakitzeko eskubidea aldarrikatu du Gure Eskuk

Trebiñuko herritarrek bizi duten egoera "anakronikoa" salatu zuten igandean.


Eguneraketa berriak daude