Espainiako Gobernua Europakoaren atzetik joan da gai honetan, besteak beste, 2017an onartu berria baitzen Hego Euskal Herrian lau asteko baimena, eta aste gutxira Europako Batzordeak lau hilabetekoa proposatu zuen.

Oraingoan, kontziliazioaren gaiari begira, Europak neurri gehiago exijitu dizkio Espainiari, eta kasurik egiten ez zionez, zigor-mehatxua ere egina zion: neurririk hartu ezean, abuztu honetatik aurrera, egun bakoitzeko 40.000 euro ordaindu beharko lizkioke Espainiak Europari. Dena dela, zigorra ez da berria: orain arte eguneko 9.000 euro pagatzen zizkion. Espainiako Gobernuaren neurria presaz heldu da, hortaz. 

Xehetasunak astearte honetan emango badituzte ere, dagoeneko iragarri dute hamasei asteko gurasotasun baimena igo egingo dutela, El País-en irakur daitekeenez. Legeak atzeraeragina izango du 2024ko abuztuaren 2tik aurrera jaio diren haurrentzat.

Gurasotasun baimena hamazazpi astekoa izango da bi gurasoko familiaren kasuan, eta horiek nahitaez hartu beharko dira haurrak urtea bete bitartean. Horrez gainera, haurrak zortzi urte bete bitartean, orain arte aukera zegoen zortzi asteko baimen ordaindua hartzeko, era malguan; eta orain, hamarrera igoko dute. Gurasobakarren kasuan, zifra bikoiztu egin dute: hamasei aste zeuzkaten orain arte, eta 32 izango dira orain.