2010eko abenduan atxilotu zuten Atenasen. Armak edukitzea eta talde terrorista bateko kide izatea egotzita sartu zuten kartzelan.

Hemezortzi hilabetez egon daiteke gehienez espetxeratze prebentiboan Grezian. Epe hori betetzear zela, ordea, CCF (Suzko Zelulen Konspirazioa) talde terroristako kide izatea egotzita luzatu zioten auzirik gabe preso egotearen denbora. Kasu honetan, legez, gehienez ere beste hamabi hilabete pasa daitezke egoera prebentiboan gatibu.

CCF taldeak ez dauka odol deliturik. Estatuaren kontrako zenbait ekintza hartu ditu bere gain.

Orain hilabete bukatu da lehenengo hemezortzi hilabeteez gain luzatu zioten urte betea, eta egoera berdinean jarraitzen duenez, gose greba hasi du Kostas Sakkasek.

Hilabeteren bueltan, uztailaren 5ean, manifestazio bat egin zuten Sakkas ingresatuta  dagoen Nikaiako (Atenas ingurua) ospitalera.

Sare sozialetan ere oihartzuna izaten ari den gaia da. #free_Sakkas etiketarekin presoa askatzearen aldeko mezuak ari dira Twitter-en zabaltzen.