Enplegatzaileek, beraz, seigarren lanegun bat inposatu ahalko diete beharginei, larunbatean edo igandean ere lanera joan daitezen. "Ekoizpen-beharren" arabera, gainera, azken unean langileen ordutegiak eta egutegiak aldatu ahalko dituzte enpresek; nahikoa izango da 24 ordu lehenago langilea jakinaren gainean jartzearekin.

Horri lotuta, "guardia-langileentzako" kontratuak ere finkatu nahi dituzte erreformaren bidez. Guardian daudela iritzi den beharginen kasuan, ordutegi finkorik ez izatea legeztatu nahi dute, eta enplegatzaileari eman nahi diote, unean-unean, euren lan egutegia erabakitzeko gaitasuna. Kasu horietan ere, barregarria izango da derrigorrezko jakinarazpen-epea: 24 ordu lehenago jakinarazi ahalko zaizkie egutegiak eta ordutegiak beharginei.

Hori gutxi balitz, kaleratzeak erraztea ere jasotzen du lan erreformak: enplegatzaile baten aurreneko kontratua izan badu, langile bat justifikatutako arrazoirik gabe eta kalte-ordainik gabe kaleratzea legezko bihurtu nahi du gobernuak. Bestalde, grebalariek egindako protesta-blokeoak gogor zigortzea ahalbidetu nahi dute: 5.000 eurorainoko zigorrak aurreikusi dituzte erreforman.

Erantzun modura, kalera atera dira jada Grezian. Aurreko ostegunean bertan hasi ziren lan erreformaren kontrako protestak hiri nagusietan: Atenasen, Tesalonikan, Patrasen, Larisan, eta abar. Grebara jo zuten hainbat sektoretan; hala nola, garraioan, osasungintzan eta hezkuntzan.