ARGIA.eus

2020ko ekainaren 01a

Gor zigiluak disko bikoitz batekin ospatu du bere 25. urteurrena

  • 50 abesti dakartza, 25 euskaraz eta beste 25 gaztelaniaz. Balerdi Balerdi, Exkixu, Pottoka, Koma, Ken Zazpi, Leihotikan, Berri Txarrak, Su ta Gar, Skalariak, Altxatu, Parabellum, Kojon Prieto y los Huajalotes, Stupenda Jones, Vendetta, Muy Fellini, Bizardunak, Los Ganglios, Marea edota La Polla dira bildumara gehitu dituzten taldeetako batzuk.

Entzun! @entzuner
2015eko abenduaren 16a

Esaldi ezaguna bezain errepikatua izanagatik, ez da gordetzen duen egia txikiagoa. Izan ere, "zeinen azkar pasatzen den denbora!" Segur aski, hori bera pentsatuko zuen Patxi Goñik Manuel de Falla kaleko kuartelean zegoela, diskoetxeak 2016an 25 urte beteko zituela ohartu zenean.

25 urte asko dira. Doinu eta bizipen andana. Kontzertu franko. Estudioko lana, bulegokoa ere, prentsaurrekoak, maketa entzunaldiak talde berrien arrastoan, Durangoko azokak (bata bestearen atzetik, Marmotaren eguna bailiran), kontratuak, negoziaketak, telefono deiak, banaketa lana, faxetik Interneterako jauzia, diskogintzaren krisia... eta kasik 250 disko!!! Ez da marka txikia.

Horregatik, 25 urte betetzea gauerdiko eztula ez delako, Iruñeko diskoetxeak Gor, 25 urte 25 abesti izenburuko disko bikoitza argitaratu du. Baina kontuz, izenburua zertxobait nahasgarria izan badaiteke ere, lan honek 50 kantu dakartza, beti ere diskoetxeko talde esanguratsuenenak. Izan ere, CD formatua mugatua baita: "Zaila izan da abestien zerrenda egitea, zenbait talde kanpo geratu dira, ezinezkoa izan baita guztiak sartzea", abixatu dute Gor diskoetxeko kideek. Edonola ere, Balerdi Balerdi, Exkixu, Pottoka, Koma, Ken Zazpi, Leihotikan, Berri Txarrak, Su ta Gar, Skalariak, Altxatu, Parabellum, Kojon Prieto y los Huajalotes, Stupenda Jones, Vendetta, Muy Fellini, Bizardunak, Los Ganglios, Marea, Buitraker, Doctor Deseo, Lendakaris Muertos, Memo, Flitter, The Sparteens edota La Polla dira bildumara gehitu dituzten taldeetako batzuk (ikusi zerrenda guztia azpian).

Entzuleak dagoeneko urte batzuk sorbaldan metatuta baditu, iraganeko denboretara bueltatuko dio bilduma honek ezinbestean. Gaztetxoa bada aldiz, 1991 urtetik 2015 urtera bitarteko zigiluko kantu eta talde esanguratsuenetako batzuk entzungo ditu, Gor diskoetxeko historian ez ezik, Euskal Herriko pop musikarenean ere murgilduz.

Oharra: Albiste hau Entzun!-en webgunetik ekarria da Creative Commons lizentzia libreei esker.

Kanal honetan artxibatua: Diskoak

Diskoak kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude