Fukushimako lurrikara, tsunamia eta istripu atomikoa gogoratu dituzte zazpigarren urtez

  • Londrestik Tokyora, Paris eta Madrilen barrena, ugariak izan dira 2011ko martxoaren 11 ilun hartan Japonia azpikoz gain jarri zuten hondamendien oroitzapenezko ekintzak. Urtetik urtera oihartzun gutxiago dutenak, hori ere egia. Hondamendiaren orbanak erraz ahazten baitituzte mundutarrek... beren larruan betikoz sufritzera kondenatutakoek ez bada.

Pello Zubiria Kamino @pellozubiria
2018ko martxoaren 12a
Fukushimako istripuaren oroimenez militante antinuklearrak igandean Tokyoko kaleetan manifestatzen. (Argazkia: Echo.net)

Japoniako milaka familiak nork bere intimitatean oroitu zituen duela zazpi urte galdutako senideak: 18.000tik gora izan ziren 2011ko martxoaren 11ko lurrikarak eta batik bat haren ondorengo tsunamiak hil zituenak. Herrialde osoan zehar ugariak izan dira isilunezko momentuz eta hilerrietan bezala mendi, soro eta hondartzetan galdutako senide eta lagunei egindako ofrendaz osatutako ekitaldiak, pribatuak eta publikoak.

Tsunamia eta lurrikara hondamendi  naturalak izan ziren bezala, Fukushimako zentralaren istripu eta leherketa gizakiak eragin zituela eta energia nuklearra erabiltzen den edozein gunetan errepikatu daitekeela oroitarazi zuten beste ospakizun ugaritan munduan zehar. Aurreko urteetan baino indar gutxiagorekin izan arren, ekitaldiak izan dira Tokyon, Parisen, Londresen, Madrilen... eta mundu osoan.

Igandeko elkarretaratzea Parisen. (Argazkia: Stephane de Sakutin)

Urteak badoaz, Fukushimako zentral inguruetatik ebakuatutako milaka herritarretatik 70.000tik gora oraindik bizi dira kutsadura handiegiagatik kanporatuta. Beste asko derrigortu dituzte kutsatutako eremuetara itzultzera, Japoniako Gobernuak pertsonak urtean nozitu dezakeen erradiazio kopuru maximoa igo egin zituelako. Eta hala eta guztiz ere, geratzen dira eremuak non ez dagoen bizitzeko eskubiderik ezta kutsatzeko arriskuz ere. Horietako batera herritarrek egindako txango bat ikus daiteke martxoaren 11rako zabaldu den bideo honetan:

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Istripu nuklearrak  |  Hondamendiak

Istripu nuklearrak kanaletik interesatuko zaizu...
Agur eta ohore 2017, lurtarrok Rutenio 106 ezagutu genuen urtea

Udaberrian ikasi genuen Torio, Norvegiako Haldengo zentraletik ihes eginda Europan barreiatu zen kutsagai erradioaktiboaren izena. Udazkenean egokitu zaigu Rutenio 106 ikasi beharra, baina oraindik inongo agintarik ez du aitortu ez non, ez zein istriputan, ez nori egin dion ihes naturan aurkitu ezin den isotopoak. Ziurrenik Errusiako Maiak faktoriatik egin du eskapo munduan industria nuklearra nola berrantolatzen ari diren erakusten duen pozoiak: ondo ikasi izena.


'Rutenio 106' kasua
Zergatik ezkutatzen dute laino erradioaktiboa Europako agintariek?

Egunak aurrera joan ahala, nabarmenagoa da irail amaieraz geroztik Europa zeharkatu duen laino erradioaktiboari buruzko informazio falta. Errusiatik iritsi dena ziurtzat jota, isuriaren jatorriaz hipotesiak zabaltzen ari dira. Eta herritarren osasuna zaintzeko ardura duten erakunde nagusienganako kritikak ere bai.


Errusiako zentral nuklearren batek istripua izan eta Rutenio-106 erradioaktiboa hedatu du Europan

Errusiak dio bere ezein zentral atomikok ez duela matxurarik izan, baina Frantzia eta Alemaniako segurtasun nuklearreko agentziek erakutsi dute handik iritsi dela Europan zehar urri hasieran hedatu den laino kutsakorra, Rutenio-106 zeraman. Publiko zabalaren oharkabean pasa den arren, erradioaktibatearen arriskuez okupatzen diren erakundeek ohartarazi dute arriskuaren larriaz.


Zentral nuklearrak ixteko galdeketan baietz bozkatu dute Suitzako herritarrek

Energia nuklearraren erabilera modu mailakatuan ezabatzea aurreikusten duen Energia Legea onartu dute Suitzan, bozen %58,2rekin. Zentral berriak eraikitzea debekatu eta funtzionamenduan daudenak ixtea du helburu.


2016ko urrian Norvegian jazo den istripu nuklear ez hain hutsal hori

2017ko otsailean iodo erradioaktibo ihes bat detektatu zen Europan, Finlandiatik hasita Euskal Herriraino, hasieran agintariek aipatu ere ez zutena arrasto ahulegiak omen zirelakoan. Kutsaduraren iturri bila, errusiarren arma eta zentral nuklearrak ziren susmagarriak hasieran; azkenean ez da jatorria argitu eta hedabide handiek aipatu ere ez dute egin. Baina bidean azalera atera da Haldengo zentral zaharra geldirik dagoela Norvegian, urrian gertatutako istripuagatik. Kasualitatea?


Zer ikasi dugu Harrisburgen eztandaren ondoren?

Three Mile Island zentraleko istripu nuklearraren 38. urteurrena bete da, AEBetako historiako larriena, eta munduko hirugarrena. Zentralak ihes bat izan zuen eta substantzia erradioaktiboz betetako burbuila bat zabaldu zen zentraletik kanpo. Harrisburgen irakaspena, baina, ez zen nahikoa izan Txernobyl eta Fukushimako istripuak saihesteko, ezta zentral nuklearrak ixteko ere.  


Europan detektatu den ihes erradioaktiboa Norvegiako zentral batek eragina izan daiteke

Otsailean iodo erradioaktibo ihes bat detektatu zen Europan, Finlandiatik hasita Euskal Herriraino, hasieran agintariek herritarrei azaldu ez zietena arrasto ahulegiak omen zirelakoan. Armada errusiarraren arma edo zentral nuklearretako baten ihesaren ondoriotzat jo zen arren hasieran, orain zenbait aditu hasi dira lotzen joan den urrian Norvegiako Halden zentralean gertatutako istripuarekin.


Azkenak
EGILEA
Eguneraketa berriak daude