Fukushima gogoan, bigarren urteurrenean mobilizazioak munduan
Fukushima Daiichi zentral nuklearraren hondamendiaren bigarren urteurrena gainean daukagun honetan, mobilizazioak ari dira antolatzen mundu osoan barrena.
Mobilizazio nagusiak Japonian burutuko dituzte, noski. Agian gure artean lortuko dute azken hilabeteotako informazio eta mobilizazio ugariek eman zaiena baino oihartzun handiagoa. Albiste hau irudikatuz, hango deialdiaren afixa.
Japonian gutxienez 32 hiritan izanen dira mobilizazioak. Azken ekitaldi nagusia Fukushima hirian burutu nahi dute 11an, bertan osatzeko aurreko bi egunetan mundu osoan antolatutako giza kate erraldoien sarea. 40.000 kilometroko gerriera duen Lurra planeta hartzen dutela irudikatzeko, mundu osoko elkarretaratze eta mobilizazioetan 40 milioi lagun mugiarazi nahi dituzte antolatzaileek.
Gainerakoan, Japonian iragarrita daude mobilizazioak honako hiriotan: Iwanai (Hokkaido), Matsuyama, Chiba, Tokyo (Meiji Park 9an eta Hibiya Park, Shinjuku eta Tamachin 10ean), Kawasaki, Kashiwazaki, Niigata, Yamanashi, Nagano, Gifu, Hamamatsu, Shizuoka, Mie (Nahari and Tsu), Shiga, Osaka, Nishinomiya, Wakayama, Matsuyama, Kochi, Kita Kyushu, Fukuoka, Miyazaki, Kagoshima, Nagoya, Shimonoseki, Sendai eta ororen azkena Fukushima-cityn.
Mundu osoan barrena deialdiak edonon ari dira ugaltzen. Hona zenbait adibide (aldez aurretik eskertuz gure ingurukoez irakurleek bidali diezaguketen informazio oro):
- Londresen martxoaren 9tik 11 artean “Remember Fukushima, no to nuclear power”
- Frantzian Parisko mobilizazioek izango dute garrantzia berezia, Europa osotik bertara hurbilduko baitira antinuklear asko, Estatu frantsesa izaki Europako herrialderik nuklearzaleena. Gure inguruan,Bordelen ere antolatuta dago.
-AEBetan San Franciscon eta New Yorken garrantzizkoenak.
- Alemanian gutxienez 21 hiritan antolatu dituzte, bereziena Berlinen izango delarik.
- Estatu espainiarrean burutuko direnen zerrenda oraingoz CGTren Rojo y Negro kazetatikezagutzen dugu; tartean aipatzen ditu Bilbon, Donostian, Gasteizen eta Iruñean antolatuta omen daudenak.
- Eta munduko herrialde gehienetan izango dira mobilizazioak, hasi Mongoliako Ulan Batorretik eta Indiako Munbairaino.
Oharra: Pello Zubiriaren Xehe blogetik ekarritako albistea da hau.
Erradiazio eta segurtasun nuklearreko adituek adierazi dutenez, Fukushima Daiichiko instalazio nuklearretik isurtzen ari diren ur erradioaktiboa ez da mehatxu esanguratsua, ez itsasoko bizidunentzat, ezta pertsonentzat ere. Hala adierazi dute Science aldizkarian argitaratutako... [+]
Halabeharrez hasi dira agorrilaren 24an Fukushimako zentraleko urak itsasora jaurtikitzen; ur kontaminatuak metatzeko zisternen %97 beteak dituztelako eta etenik gabe gehitzen zaielako ura –egunero 140 tona–. Ur "deskutsatuak" izanik ere, herritarrek... [+]
Japoniako Gobernuaren erabakiak protestak eragin ditu herrialdean, eta besteak beste, Txinak kritikatu egin du erabakia. 2011 urteko istripu nuklearraren ondorioak oraindik pairatzen dira.
