Le Monde egunkariaren arabera, Europak une zurrun eta estu bizi du Kataluniako prozesuaren aurrean. Estatuetako buruzagiek Espainiako Gobernua sostengatzen dute, baina Bruselan urduritasuna gero eta nabariagoa da. Frantziaren sostengua agerikoa da begi-bistako arrazoiengatik. Macronen hitzetan, Mariano Rajoy da bere solaskide bakarra Europako Kontseiluan.

Kataluniako Erreferendumak ez duela deusetarako balio izango, diote Europako Kontseiluko buruzagiek. Alta bada, Le Monde-k dioenez, hauek jakitun dira, Katalunia ez da orain arte izan dena izangoa, urriaren 1eko biharamunean: “Prozesu katalanak Pandora Kutxa ireki du eta herri gabeko estatuen autodeterminazio eskubidea lau haizetara zabaldu da modu baketsuan”.

Le Figaro-k arrisku handiak ikusi ditu erreferenduma gauzatzeko unean. Kataluniako Govern-ak Espainiako Estatuaren debekuari aurre egin dio egunez egun. Desobedientzia aldeko jarrera nagusitzen ari da. Gertatzear dena ez da trantsizioaz geroztik antzeman izan, inork ezin du iragarri bihar gertatuko dena.

L’Humanité-k berriz, Katalunia impasse batean sartu dela dio. Espainiako Gobernuak eta Estatuko botereek irteera gabeko kale batera eraman dute prozesua. Prozesua baina, milaka herritarrek bultzatua da Kataluniako Govern-erekin batera. Espainiako Legearen aldekoen eta independentisten aldekoen artean, populazio zabal isil baten jarrerak –botoak alegia–, desoreka dezake balantza.       

Libération-k Carles Puigdemont presidenteak gidaturiko prozesuaren baliabideak sendotzat jo ditu. Bozkatzeko bulegoak, boto-ontziak eta boto-paperak prest daudela azpimarratu ditu: "Kataluniako Gobernuak inork gutxik espero zuen ahalmena eta sendotasuna agertu ditu aste honetan", Espainiako Gobernua urduri ikusten du Libération-ek.

La Croix egunkari tradizionalistak “agertoki guztiak zabalik daude, denak dira posible” idatzi du. Duela hamabost egun ez bezala, Espainian iritzi publikoa gero eta uzkur ageri da Espainiako Gobernuaren eta Mariano Rajoy presidentearen aurka.