Foro Sozialak eskatu du Lasa eta Zabalaren 40. urteurrena agenda instituzionalean sartzeko

  • Urriaren 16an 39 urte bete dira GALek bi gazte tolosarrak Baionan bahitu zituenetik. Foro Sozial Iraunkorrak gogorarazi du erreparaziorako urratsak eman behar direla; hala nola Espainiako Gobernuak gerra zikina aitortzea eta berdin babestea ETAren zein Espainiako Estatuaren biktimak.


2022ko urriaren 18an - 10:44

Foro Sozial Iraunkorrak eskaera zehatzak egiteko baliatu du Joxean Lasa eta Joxi Zabala gazte tolosarren bahiketaren urteurrena, eta “bizikidetza demokratikoaren eraikuntzan aurrera egiten jarraitzeko” galdegin du kasuaren 40. urteurrena agenda instituzionalean txertatzeko. Bi arrazoi azpimarratu dituzte: “Biktimen kategorizazioa gainditzen laguntzeko, eta biktima horien eta haien senideen erreparaziorako”.

1983ko urriaren 16an GALek Lasa eta Zabala bahitu zituen Baionan. Guardia Zibilaren Donostiako La Cumbre jauregiko instalazioetan bortizki torturatu eta Alacantera eraman zituzten. Bertako landan hil zituzten eta gorpuak kare bizitan ehortzi. Haien gorpuzkiak 1995ean identifikatu zituzten, eta Euskal Herriratu zituztenean, Hondarribiko aireportuan eta ehorzketan Ertzaintzak senideei eraso egin zien. Foro Sozialak gogorarazi du behartutako desagerpenen hamalau euskal kasu dokumentatu direla, eta horietatik zazpi argitu gabe daudela oraindik.

Lasa eta Zabalaren kasuan “giza eskubideen urraketa guztiak” biltzen direla salatu dute: “Bahiketa, tortura, hilketa, behartutako desagerpena, ehunka kilometrora kare bizian ezkutatzea, biktima gisa ez aitortzea eta familiak diskriminatzea, eta, gainera, poliziek familien dolua ez errespetatzea beren gorpuzkiak jasotzean”. Eta urraketak “bereziki larritzat” jo dituzte egileak “funtzionario publikoak” direlako.

Eman beharreko urratsak

Horregatik guztiagatik, Foro Sozialak azpimarratu du “funtsezko bi urrats” emateko beharra 40. urteurrenaren harira: Espainiako Gobernuak eta presidenteak aitortzea eragindako kaltea, hala nola gerra zikina eta torturak; eta Eusko Jaurlaritzak auzia agenda instituzionalean sartzea eta “zabalkunde pedagogikoa” ematea.

Erakundeak baloratu du azken hilabeteetan “aurrerapausoak” eman izana. “Hala ere, asko dago egiteko oraindik ere Estatuaren biktimek pairatzen duten tratamendu asimetrikoa gainditzeko”, ohartarazi dute.


Kanal honetatik interesatuko zaizu: Oroimen historikoa
Frankistek fusilatutako Modesto Manuel Azkona Garaicoechea Arabako Diputatu eta Saratxoko bizilagunaren gorpua identifikatu dute

Alesbesekoa jaiotzez, Saratxon bizi zen Unión Republicana alderdiko kidea, bere emaztea hango maistra baitzen. 1936ko irailean erail zuten frankistek eta ostiralean lortu zuten bere gorpuzkinak identifikatzea.


Jesús Carrera, frankistek torturatu eta fusilaturiko buruzagi komunistaren bizitza pantailara

Hari buruzko aipamenik apenas iritsi zaigu historia liburuetan, baina Jesús Carrera Olascoaga (Hondarribia 1911 – Alcala de Henares 1945) Espainiako Alderdi Komunistaren idazkari nagusi izatera iritsi zen. Frankistek atxilotu, torturatu eta fusilatua, bere... [+]


“Ezin da kontsulta baten emaitzetatik erabaki Iruñeko Erorien Monumentuaren etorkizuna”

Erorien Monumentua eraisteko eskatzen duten memoria elkarteen ustez ezin da eraikin frankista horren etorkizuna utzi herritarren esku: “Faxismoa omentzen duen eraikinarekin zer egin frankismoaren oinordekoek ere parte hartzen ahal duten galdeketa batek ezin du... [+]


Eguneraketa berriak daude