EAJko zinegotzi batek bere alderdiaren eta PSE-EEren arteko paktuak ezartzen zuen boto-diziplina hautsi eta zuri bozkatu zuen, EH Bilduko Ana Carrerek alkatetza lortzea ahalbidetuz.

Gertakari horren erreakzio gisa, sozialistek Gasteizen jarrera aldatu zuten eta ez zuten Urtaran jeltzalea babestu, tarte batez EAJk Arabako hiriburuan ziurtzat jotzen zuen alkatetza kolokan jarriz –Irabazik azken orduan EAJri emandako babesari esker izendatu dute Urtaran alkate–.

Calparsororen susmoak

Ser irrati kateak aurreratu duenez, Calparsorok uste du talde politikoen borondatearen “desitxuratzea” gertatu da Andoainen. Gainera, publikoki EAJko zein zinegotzik aldatu duen botoa esan ez denez, fiskal nagusiaren aburuz “hipotesi guztiak” zabalik daude, tartean “mehatxuak” edo “xantaia” jasan izana.

Andoainek “terrorismoa intentsitate bereziz” jasan duela gogora ekarri du hipotesi horiek kontuan hartzeko.