EHZ festibala badator, aurten ere balore eraldatzaileak praktikan jarriz
Aurten ere EHZa Lekorneko gazteluaren bueltan izango da. Azken urteetako norabideari jarraituz berritasunekin dator, eta “jendarte idealaren” eraikuntzan sakontzeko urrats berriak eman dituztela azaldu digu Pauline Guelle bozeramileak. Aurrez sarrerak erosteko epea asteartean amaitu zen arren, bertan izango da aukera.
Festibaleko bozeramaile Pauline Guellek “biziki kontent” daudela esan digu, aurten bereziki gaueko eskaintza oparoa eta eguneko ikuskizun eta gune alternatiboen oreka lortu dutelako (egitarau osoa hemen). “Ikusgarrien helburua ez da jendea erakartzea, gure izpirituarekin bat egiten duen egitaraua osatzea baizik; ez dugu jende pasiboa nahi festibalean eta publiko aktiboa lortzen ahalegintzen gara egunean zeharreko egitarauarekin”. Ikusgarrien egitarau zabalaz gain, haurren txoko eta gune feminista izango dira.
Talde engaiatuak, parekideak eta ez komertzialez osatutako afixa lortzeko urte osoan gogor aritu dira, eta ez alferrik: Akua Naru, Oum, Nova Twins, Las Taradas… bezalako taldeak ez baitira Euskal Herriko jaialdietan ikusi ohi. Hainbat eragileak oholtza gainean parekidetasuna bermatzea “zaila” dela dioten arren, EHZ festibal osoan gutxiengoak dira emakumerik ez duten taldeak.
Duela bi urte Lekornen egindako hitzaldietan, emakumeen ikusgarritasuna landu zuten: “Ez soilik oholtza gainean zenbat diren, adibidez zein rol duten ere hausnartu genuen. Antolaketan aldaketak egin ditugu eta garrantzia ematen diogunez, aurten inoiz baino emazte musikari gehiago izango dira festibalean,” azaldu digu Guellek.
Ez da ordea festibalaren momenturik hoberena, izan ere, 2014.urtean izandako enbatak eragindako zulo ekonomikoa ezin altxa dabiltza festibaleko kideak. Crowdfunding kanpainan 28.000 euro lortu zituzten arren, ez da nahikoa izan eta eredua bera “eztabaidagai dago”. “Festibalen baloreei lotuta, eredu kapitalistez harago joan beharra dugu. Bestelako laguntza eta ereduen bitartez egin behar dugu bideragarria den eredu bat”.
Zentzu horretan, hornitzaileen garrantzia azpimarratu du Guellek. “Gure laguntzailerik hoberenak gure hornitzaileak dira, eta beraiekin batera antolatu behar dugu festibala eta honen gaineko erabakiak”. Hori bai, festibala aldatu arren EHZren espiritua mantendu egingo da urtero, “Ipar Euskal Herrian eta Euskal Herri osoan betetzen duen rola ezinbestekoa delako”.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
Irailaren 15eko bileraren ostean, kolokan zegoen EHZ festibalaren etorkizuna argitu zen. Talde motore baten sorrerak eman zion jarraipena proiektuari.
Irailean "hil ala biziko" bilkura egin ondotik, hamabost gazteko talde batek hartu du EHZ berriz martxan jartzeko ardura. Ximun Bosq-ek eta Irati Fernandezek eman dituzte gogoetaren xehetasunen berri.
Iparraldeko 15 bat gazte dira, hiru lurraldetakoak eta helburua dute EHZ festibalaren izpiritua bizirik mantentzea.
Hil ala biziko biltzar nagusia antolatu du EHZ festibalak. Talde motor baten behar gorrian da.
Arrosa, Idauze-Mendi, Heleta eta Lekornetik pasatu ostean, aurtengo EHZ Nomada izanen da.
2017an etenaldia egitea erabaki ondotik eta 2019an eraberrituta itzultzeko helburuarekin, ez zen Euskal Herria Zuzenean Festibalaren ediziorik espero aurten. Azken momentuan, baina, EHZ Nomada antolatzea erabaki dute.
Etenaldia iragarri du EHZ festibalak eta 2018an jaialdirik ez dutela antolatuko baieztatu dute. Nolanahi, 2019an proiektua berrituta itzultzeko asmoa agertu dute.
Zea Mays, PiLT, Anestesia eta Biarritz Dance School taldeak igoko dira oholtza gainera. Ezpeletako merkatu estalian egingo dute jaia arratsaldeko zazpietatik aurrera.
EHZ festibala bertan behera geratuko dela iragarri dute ostiral honetan. Antolatzaileek arratsaldean eginiko agerraldian azaldu dutenez, eguraldi iragarpenak behartu ditu erabakia hartzera.
EHZ festibala bertan behera geratu zela jakinarazi eta berehala hainbat jaialdi txiki sortu dira eta sortzen ari dira hari babesa emateko, Elkartasun erauntsia lelopean. Besteak beste, Bilboko Biba kulturgunean eta Donostiako Bukowskin antolatu dituzte elkartasun jaiak, eta datorren astean, hilaren 11n, Gasteizko gaztetxean egingo dute.
