Erakundeak hiru atal berezitu izango ditu: 233 kideko elkargo kontseilua, 69 kidek osatutako batzorde iraunkorra eta 25 kideko batzorde eragilea. Oraingo hamar herri elkargoen eremuko lurralde poloak izango dituzte hurbileko zerbitzuak bermatzeko, baita eskumenen araberako sindikatuak. Bi aholku batzorde ere izango ditu: Auzapezen Biltzarra eta Garapen Kontseilua, gizarte zibileko eragileen ahotsa izango dena. Mendialdea eta hiriguneak batuko dituen elkargo bakarra “iraultza txiki” gisa hartu dute eragileek.

Kontseiluko 233 kideek beste bi batzordeetako kideak aukeratu behar dituzte orain. Urtarrilaren 23ko bileran lehendakaria nor izango den erabakiko dute, Jean Rene Etchegaray faborito izanik. Aurrekontuak apirila amaitu aurretik onartuta egotea espero da.

Euskal Elkargoak hizkuntza eta kultura politikaren eskumenak hartuko ditu, Euskaltzaindiak eta Euskal Konfederazioak eskatuta. Egun dauden hamar herri elkargoen eskumenak ere bereganatuko ditu, tartean lurralde antolaketa, garapen ekonomikoa, ingurumena eta etxebizitza. Eskumen hauen kudeaketa elkargoaren esku geratzen den edo herriei itzuli behar zaien erabaki beharko dute bi urteko epean.