Ostegunean, Europar Batasunak bat egin zuen Errusiari zigor gogorragoak –ekonomiko, komertzial zein migratzaileak– ezartzeko AEBek azaldutako asmoarekin, nahiz eta ez diren mehatxuez harago joan; lehenago bide diplomatikoak urratu behar direla esan dute europar agintariek.

"Inork ez du tropak bidaltzerik nahi, baina EBk batasuna agertu du eta Errusiak probokazioekin jarraitzen badu zigor gogorrak izango ditu prest", adierazi dute Europako iturriek, Claudi Perez kazetariak El País egunkarian jaso duenez. "Errusia Europarako esportazioen menpe dago, gu Errusiaren menpe baino gehiago", diote iturri horiek.

Europako goi agintariek atzo egindako bilkuran, Baltikoko herrialdeek, Erresuma Batuak eta Errumaniak agertu zuten jarrerarik gogorrena Errusiaren aurka. Aitzitik, Alemania "konponbide pragmatikoago" baten alde agertu zen. "Ondorioak garbi al dauzkagu? Hurrengo pausorako prest al gaude?", galdetu zuen Angela Merkel kantzilierrak.