Aurten ere hurbiltzen ari zaigu etorkinen laguntzen dabilen Cimade elkarteak antolaturiko Migrant´Scène festibala. Hendaiako Les Variétés zinema gelan iraganen da azaroaren 16an.

18:30tan Tori et Lokita jarriko dute ikusgai, Jean-Pierre eta Luc Darlenne egileen azken sorkuntza. Etengabeko borrokaren sinonimo den bi etorkinen egunerokoa kontatzen du pelikulak. Aurtengo Canneseko festibalaren sari berezia jasotakoa da.

Ondotik, 20:30tan, La Traversée pelikula proiektatuko dute, Varante Soudjianen azken komedia.

Askatasunak, berdintasunean eta elkartasunean leloa aukeratu dute antolatzaileek: "'Askatasunak berdintasunean', eskubideen benetako berdintasuna ezinbesteko baldintza delako guztion askatasuna bermatzeko. Desberdintasunek menderatze-harremanak eta esplotazio egoerak sortzen dituzte. Laburbilduz, berdintasunik gabeko askatasuna menderatzaileen askatasuna da; mendekotasuna, menpekotasuna eta zapalkuntza dakarzkiena. Eta "askatasunak elkartasunean", gizarte bidezkoago hau eraiki beharra daukagulako, zapalduen aldean jarriz".

Elkartearen ezagutzeko eta ideiak trukatzeko denbora ere bideratuko dute Cimade-ko kideek.