Azkar ibili da Carlos Urquijo. Uemak urtarrileko batzar nagusian onartu zuen Eako Udalak mankomunitatean sartzeko egindako eskaera, eta dagoeneko, haren aurka egin du. Helegitearen arrazoia: udalak dauzkan eskumenak gainditzen dituela.

Zeraingo eta Berastegiko udalen aurkako helegiteak oraindik epaitegietan daude. Hiru udalek Ueman jarraitzeko asmoa adierazi dute.

Espainiako Gobernuaren EAEko ordezkaritzak helegiteak ez ditu jarri Uemako kideen aurka soilik, beste bost konturengatik ere bai: erabilera planak, hizkuntza irizpideak, kontratazio irizpideak, diru-laguntzak eta elebitasun eskaerak.

Dirudienez, Carlos Urquijok ez du etsitzeko intentziorik, nahiz eta sei alditan epaitegiek haren helegiteak bertan behera utzi dituzten. Hala, epaitegiek Amezketa, Arama, Gaintza, Bergara, Elgeta eta Irurako udalek aktak euskara hutsean bidaltzea erabat legezkoa dela erabaki dute. Aldeko sei epai eta kontrako bat. Izan ere, Lekeitioko Udalak aurkako epaia jaso zuen. 40 udal inguruk aktak euskara hutsean bidaltzeagatik errekerimendua edo helegitea jasoa dute.