Azken asteetan jakin da Generalitateak Berlinen, Ginebran eta Londresen dituen kanpo ordezkaritzak zelatatu dituela Espainiako Gobernuak, horien itxiera judiziala justifikatuko luketen txosten polizialak osatu asmoz. Orain jakin da zelatatzea harago joan dela. Alemaniako Telepolis hedabideak argitaratu eta Públicok jaso duenaren arabera, Espainiako Gobernuak Alemaniako zenbait politikari eta ekintzaile zelatatu ditu, tartean Berlineko Kataluniako Errepublikaren Aldeko Komitearen (CDR) ekimenak.

Andrej Hunko Die Linke alderdiko ordezkaria da Alemaniako Bundestagean. Mozio bat sustatu zuen legebiltzar horretan, Kataluniako auziaz eztabaidatzea bilatzen zuena. Espainiako Estatuak Berlinen duen enbaxadoarearen posta elektroniko batean Hunko eta bere jarduerak aipatu ditu. Enbaxadoreak “ekintzaile erradikal” izendatu du politikari alemaniarra. Ez da Espainiako Gobernuak Hunko zelatatzen duen lehendabiziko aldia. 2011n ezker abertzalearen ordezkari batekin bildu zen politikari alemaniarra, eta jarraipenak izan zituen. Hunkok azalpenak eskatu zizkion orduko enbaxadore Rafael Dezcallar-i, eta honek horrelakorik ez zela errepikatuko agindu zion, Hunkoren esanetan.

Azalpen eske

Hunkok berriz ere idatzi du Espainiako enbaxadara. "Berlingo Espainiako enbaxadoreari gutuna bidali diot. Gertatuaren inguran nire kezka azaldu, eta zelatatzea bertan behera uzteko exijitu diot”, adierazi dio Público egunkariari. Horrez gain, Alemaniako Gobernuari galdera zuzendu dio Die Linkeko ordezkariak: "Gobernuari exijituko diogu atzerriko espioitza honi amaiera jartzeko".

Ematen du Alemaniakoa ez dela kasu isolatua. Carmela Negrete kazetariak Junge welt aldizkarian idatzitako artikuluaren arabera, Suitza eta Britainia Handiko politikariei ere egin dizkiete "jarraipenak". Adibidez, Galesko Plaid Cymru alderdiko Hywell Williams diputatuari.