Azkenean agertu da “galduta” ibili den Esako urtegiko segurtasunari buruzko Espainiako Gobernuaren txostena eta urtegiko lanekin aurrera jarraitzea ahalbidetzen du
Trantsizio Ekologikorako Ministerioak enkargatu zion azterketa Portu, Ubide eta Bideetako Ingeniarien Elkargoari, hainbat eta hainbat txostenen ondoren, honek azken gisako aholkua eman zezan-edo. Txostenaren arabera, “magalak egonkortasun nahikoa du hari atxikitako presak zerbitzuan jartzeko”. Hala ere, urtegia betetzeko eta husteko protokolo bat zehaztu beharko da, presak eta magalak zein portaera duten gertutik jarraitu ahal izateko eta eraikuntza prozesuan dagozkion aldaketak egin ahal izateko.
Koldo Martinez Geroa Baiko senatariaren esanetan, ordea, txostenaren emaitza ez da horren segurua eta ziurgabetasunez beterik dago. Geroa Baik argitaratutako prentsa oharrean senatariak dioenez, “637 orrialde dituen txostenaren lehen irakurketatik zalantza ugari sortzen dira. Ondorioen hamaika orrialdeetan hamalau alditan erabiltzen da ‘ziurgabetasun’ hitza”.
Lur-irristaketa ugari egon diren eskuin magalari buruz ere mintzo da Martinez: “‘Presente dauden zalantza kopuru handiak fidagarritasun gutxi ematen dio segurtasun koefiziente bat lortzeko edozein kalkulu edo modelizaziori”, eta bere ustez ‘egonkortasunarengan eragina duten faktoreen inguruan dagoen ziurgabetasuna dela eta, oso zaila da frogatzea egungo baldintzak segurtasun faktore onargarri baten gainetik (ez proiektuan ez eta inongo arau ofizialean ezarria) daudela”.
Gardentasun eza
Bai Martinez senataria, bai Bel Pozueta EH Bilduko diputatuak txosten honen inguruan izan den gardentasuna eskasa aipatu dute. Ikerketa 2018an agindu zuen ministerioak eta Elkargoak 2021eko apirilerako bukatu zuen lana.
2020ko otsailean Compromiseko diputatu Carles Muletek galdegin zion Trantsizio Ministerioari ea non zegoen azterketa, eta hark erantzun zion jadanik emana ziela Nafarroako Gobernuari eta CHE Ebroko Konfederazio Hidrografikoari. Baina lana ez zen ageri eta iragan apirilean, EH Bilduko parlamentari Adolfo Araizek txostenaz galdetu zion foru gobernuari, eta Javier Ramirez gobernuko bozeramaileak ihardetsi zion gobernuak ez zuela txostenik jaso. Azkenean, Pozueta diputatuari erantzunez, Espainiako Trantsizio Ministerioak irailaren 15ean Kongresuan onartu berri du uztailaren 22an utzi zuela foru gobernuaren esku.
Azalpenak eman ditzan Teresa Riberaren agerraldia eskatu du Pozuetak Kongresuan, eta bitartean, segurtasuna bermatzeko moduan egon arte, urtegiko obrak gelditzea.
"Segurtasun faltagatik" geldirik daude Esa urtegia handitzeko lanak Rio Aragon Elkartearen esanetan. Lan horien kontratua eteteko eta proiektua berrikusteko eskatu du talde horrek. "Bideragarritasun eza" onartzeko eskatu diote Ebroko Ur Konfederazioari.
Lanak duela 22 urte hasi ziren, baina urtegiaren eraikuntzak hamaika arazo izan ditu, eta oraindik lanek atzera-aurrera jarraitzen dute. Rio Aragón elkartearen eskaerari erantzunez, lanak 2027an bukatzea aurreikusten duela erantzun du CHE Ebroko Konfederazio... [+]
Ikerketa geologikoek behin baino gehiagotan ohartarazi dute, eta, orain, satelite bidezko zaintzatik heldu da abisua: Esako urtegia ez da egonkorra. Copernicusek, Lurra behatzeko Europako Batasunak abian jarritako programak, "mugimendua" antzeman du urtegiaren... [+]
Euskal Herria zeharkatzen dutenen artean ibairik handiena da Ebro. Haren ertzean mintzatu gara, Ollero bizi den Zaragozako sarreran, lertxunaren ibili geldoa, txorien kanta zoroa eta ibaiaren emari barea lagun, udaberria 33 gradura lehertu den arratsaldean, zorionez arbolen... [+]
Urtegiaren eskuin hegalak desegonkor jarraitzen duela eta, beraz, arrisku maila bat dagoela ondorioztatzen du. Txostena Ingeotyc enpresako Valentin Ibarra eta Tomas Morales geologoek egin dute Zangozako Udalaren enkarguz.