Associazione Culturale Euskara - Eromako Euskal Etxea elkartea sortzen aritu  eta 13 urtez bertako lehendakari izandako Alex Mendizabalek hauxe adierazi du martxoaren 11n, erreleboa ematerako orduan: "Jarraituko dut bazkide izaten eta ahal dudan moduan laguntzen  baina aldaketak behar direla uste dut. Astindu bat eta energia berriak. Parte-hartze zabalagoa".

Euskara Erroman: A.C.E. elkartetik EUSKARA.IT plataformara

A.C.E. elkartea 2002 urtean sortu zuten Marlene Merikaetxebarria, Paola Rosa, Wilfried Roell eta Alex Mendizabalek. Hauek dira orain arte Zuzendaritza Kontseilua osatu dutenak. Eusko Jaurlaritzak hasieratik onartu zuen A.C.E. Euskal Etxe bezala eta ondorioz aukera izan zuen elkarteak diru-laguntza publikoa eskatzeko. HABEren laguntzarekin euskara eskolak antolatzen hasi ziren eta Erroma hirian kultur programazioa osatzen. Mendizabalek adierazi duenez: "ACE ez da ordea kultur programazioa soilik. Italiatik bai Euskal Herritik guregana informazio eta laguntza bila jotzen duen hainbat jenderi ahal dugun neurri eta moduan laguntzen diogu. Hau da, Euskal Etxea da".

Urteotan A.C.E elkartearen inguruan EUSKARA.IT plataforma sortu da, eta bertan biltzen dira ondorengo proiektuak:

- Associazione Culturale Euskara - Eromako Euskal Etxea

-  www.euskara.it web orria

- Dipt Lingua e Cultura Basca dell'Università Popolare UPTER Unibertsitateko Euskal Saila

- LIBE online argitaletxea

- Programma Studi Baschi, Università ROMA3 Euskal Saila

Diru-laguntzek itota

Alex Mendizabalek salatu duenez, erakunde publikoen diru-laguntzak izugarri murriztu zaizkie azken urteotan, "eta bereziki Etxepare Institutuak axolagabeki eta ulertu ezinik, diru-laguntzaren 100% kendu dio unibertsitateko Euskal Sailari. Finantzabide berriak bilatzeari ekin behar diogu, publikoak zein pribatuak".