Ipar Euskal Herriko emazteen kontrako bortizkeriaren Behatokia 2011ean sortu zen. Zortzi udalerrik bultzatu zuten: Baionak, Biarritzek, Hendaiak, Donibane Lohizunek, Bidartek, Angeluk, Bokalek eta Hazparnek. Frantziako hainbat erakundek ere parte hartzen zuten; Baionako Ospitaleak, Fiskaltzak, Polizia Judizialak eta Jendarmeriak, besteak beste.

Azken urteetako gorabeherak

2013an interes publikoko erakunde (IPE) bilakatu zen Behatokia. 2014ean, ordea, erraztasun administratiboengatik izaera pribatuko IPEa osatzea pentsatu zuten. 2015eko apirilaren 29an IPEtik kanpo geratzen zela jakinarazteko ohar bat kaleratu zuen Prefeturak eta batzar nagusian eztabaidatzekotan geratu ziren Kazeta.eus-en arabera.

Batzar nagusira ez ziren azaldu erakunde polizialak, judizialak eta osasun arlokoak, ezta ere Frantziako Estatuak finantzatutako elkarteak. Horren zergaitia zein den susmatzen dute hautetsiek: "Ipar Euskal Herri mailako erakundea" izatea.

Horrenbestez, erakundea desegitea erabaki dute. Lau urteko lanarekin jarraitzeko, herriarteko elkarte bat sortzea aipatu dute orain.