Eider Rodriguezen Eraikuntzarako materiala liburua saritu du 111 Akademiak. Manuel Larramendi Kultur Bazkunak 1996an sortutako Beterriko Liburua literatur aipamenaren jarraipena da 111 Akademiak urtero ematen duen saria. Euskal literaturaren plazan irakurleari hitza eta protagonismoa emateko asmoz sortutako sariaren 26. edizioa izan da aurtengoa.

111 Akademia 212 irakurlek osatzen dute egun, eta haietako 127k parte hartu dute 2021eko liburu gogokoenaren saria izendatzeko prozesuan. 2022ko urtarrila eta apirila bitartean egindako hiru bozketa txandatan erabaki dute sariduna. Itxaro Bordaren Euri zitalari esker (Susa, 2021) izan da Eraikuntzarako materiala-ren lehiakidea azken txandan. Ekaineko bigarren edo hirugarren astean jendaurreko sari-emate ekitaldia egingo dutela iragarri du 111 Akademiak.

Irakurleen aburuz, etsipenaren eta oroiminaren arteko eremu lausora daraman literatur lan ederra da Eraikuntzarako materiala. Nabarmendu dutenez, “idazkera neurtua eta neurritsua” du, eta “estilo aparta”. “Protagonistak bere aita definitzen duen moduan definituko du akaso hainbatek nobela hau: gazia eta mingotsa. Zalantzarik gabe, maisulana”.

Honakoa esan zuen Rodriguezek Danele Sarriugartek martxoan ARGIAn egindako galderei erantzunez: “Ez idatzi nahiago izango nukeen istorio bat da, nahiago nukeelako bizi ez izan, baina behin bizita, bizitako hori istorio bilakatzeko unea oso aberasgarria izan da. Lagun batek esan zidan orain arte idatzi dudana prestaketa bat izan dela beste hau idazteko. Ez dut uste hori denik, baina sentsazioa dut ez dudala ipuinekin bezalako buruhausterik izan. Nahiko modu grafikoan sentitu dut atera dudala, tiraka eta tiraka. Ez dakit nondik”.