26. edizioa izango du EHZ festibalak eta Irisarrin izango da, Behe Nafarroan. Formatuari dagokionez, aurreratu dute Herriko plazako gunea dohainik izanen dela, "garrantzia handia ematen diotelako kultura deneri eskuragarri izan dadin".

Bertan, hitzaldi, zirku, dantza ikusgarri, bertso eta bestelako ekitaldi ugari eskainiko dituzte egunean zehar. Kontzertuak, berriz, pentzean izanen dira aurten ere, eta horra sartzeko, sarrera beharko da. Haurren xokoa, ospitalea, pentzea, plaza edo kanpalekua, hamaika lurrek festibala jantziko dute. Aurtengo berritasuna antzerkiari dedikaturiko leku bat izanen dela esan dute, kultur adierazpide horri leku gehiago eman asmoz.

Pentzeko eszena handian joko duten musika taldeen artean, Ezpalak, Ibil Bedi, Calling Marian, Kokoko!, Niko Etxart eta Fizt & Furiuz aurreratu dituzte.

"Dudarik gabe, Niko Etxart-en kontzertuak bazterrak inarrosiko ditu, baita Kinshasatik datorren KOKOKO! kolektiboaren afrikar musika elektrikoak ere. Fizt & Furiuz taldeak azken hilabete hauetan Luhuson gorderik prestatu dituen metalezko garrasiak entzunen ditugu eszena gainean".

Antzerki, zirku edota dantza ikusgarriek programazioa ere osatuko dute. Plazan ariko diren lehen izenak eman dituzte: Gaitistaneko Orkestra, Haatik eta Hastapenetik dantza taldeak eta akrobazietan iaioak diren Sarini Zirko konpainia.

Aurten ere, Irisarriko Ospitalea eraikinean tailer, hitzaldi eta mahai-inguru andana aterpetuko dituztela adierazi dute. "Parte hartzaileek gaur egungo erronkeninguruan hausnartzeko eta eztabaidatzeko parada ukanen dute, besteak beste euskara, gerlak, populu autoktonoen zapalkuntza edota eritasun mentalak". Josu Martinezek Baigorrin grabatutako hiru film labur proiektatuko dituztela aurreratu dute.

Sarreren aurresalmenta abian

Hiru eguneko sarrerak ehz.eus webgunean salgai dira dagoeneko, 35 eurotan, kopuru mugatuan. Egunez eguneko sartzeak berantago etorriko direla esan dute. Heldu den asteetan, festibalean laguntzaile izateko izen-ematea ere abiatuko dute.