1996an eman zitzaion hasiera EHZ jaialdiari, baina gorabeheratsuak izan ditu azken pare bat urteak. Egora hori izanik, urtarrilean jaialdiaren aurrera begirako norabideaz jarduteko bildu ziren hainbat lagun Baionako Zizpa Gaztetxean, EHZren biltzar nagusian. Bertan EHZ eraberritu baten proiektua aurkeztu zuten, eta jaialdiarekin aurrera egitea adostu. Astea astearekin batera jakinarazi dutenez, Irisarrin egingo da jaialdia.

Antolatzaileek hasieratik jakinarazi zutenez, EHZ eraberrituak bi ardatz izango ditu: kulturala eta politikoa. Iparraldeko Hitzak jasotako antolatzaileen adierazpenen arabera, jaialdiak “borroka eremua indartuko duen tresna izan behar du eragile eta elkarte ezberdinetan ari diren gazteentzat”. Kultura eskaintzari dagokionez, “hegemonikoa den kulturaz besteko proposamenak” bultzatzeko xedea du EHZk, jaialdiaren balioekin bat egiten duten artistak lehenetsiz eta kultura herrikoia bultzatuz.

Egitaraua zehaztear bada ere, jaialdiak iraun bitartean zuzenekoak bezala, eduki politikoan sakontzeko tailerrak ere egongo direla aurreratu zuten.