Euskal Autonomia Erkidegoan 284 epaileetatik hamazazpik bakarrik dute “euskarazko ahozko epaiketa aurrera eramateko maila eta gaitasuna”, esan du Jaime Tapia magistratuak astelehenean Justizia Administrazioan euskararen erabilera aztergai izan duen jardunaldi batean. Datuok 2020koak diren arren, aurtengoak ere “antzekoak” izango direla adierazi du.

Tapiaren ustez egun Justizia Administrazioak dozenaka bitarteko ditu euskaraz lan egiteko (izan itzultzaileak, adimen artifiziala, edo baliabide digitalak), nahiz eta askotan prozedurak moteltzen dituen. “Gainditu gabeko oztopo bat” dagoela onartu du, euskaraz dakiten eta epaiketa osoa euskaraz egin dezaketen “epaile gutxi” baitago. Gaineratu du fiskal eta abokatuen kasuan ere egoera ez dela hobea: 205 abokatutatik 50ek baino ez dute euskararen ezagutza egiaztatuta; eta 112 fiskaletik bederatzik baino ez dute hizkuntza-eskakizuna.

Borondate falta

Botere publikoek eta Espainiako Gobernuak Justizia Administrazioan gaztelania ez den beste hizkuntza bat erabiltzeko “borondate gutxi” erakutsi dutela salatu du Tapiak. Egoera aldatzeko berme gisa, “benetako euskalduntze-prozesu bat” abiaraztea proposatu du eta beharrezkotzat jo du Justizia Administrazioan euskara bultzatzeko bi hizkuntzak (euskara eta gaztelania) “maila berean egoteko legeak aldatzea”.