ARGIA.eus

2020ko maiatzaren 26a

Chivite lehendakari izendatzeko akordioaren bila jarraituko du PSNk

  • Horixe adierazi du Ramon Alzórriz PSNko antolaketa idazkariak asteazken arratsaldeko lehen orduetan Geroa Baiko ordezkariekin egin duen bileraren ondoren. Bilerak ikusmen handia sortu du eta hedabide ugarik jarraitu dute Foru Legebiltzarrean egin den haren aurkezpen publikoa.

ARGIA @argia
2019ko ekainaren 05a
Bileraren hasierako unea. (Argazkia: @geroabai)

Alzórrizek emandako prentsaurrean esan duenez, PSN eta PSOE erabateko sintonian dira; bai Iruñean bai Madrilen gobernu aurrerakoiak lantzeko lanean ari direla eta aste honetako bilera errondaren helburua norabide horretan doala. Azpimarratu duenez, PSNk honekin ez dio inolako desafiorik egiten PSOEri. Argi utzi du PSN 23 parlamentarioren sostenguaren bila joango dela –Geroa Bai, Podemos, I-E eta bereak– eta uste dutela horrek ematen dietela indar aski legealdiari eusteko, besteak beste, Navarra Sumaren (NS) 20 eserlekuak baino gehiago direlako.

 

PSOEko filtrazioek, ordea, hor ikusten dituzte arazoak, legealdian zehar, Ferrazetik zabaldu dutenez Chiviteren inbestidurak ez bailuke halako arazo handirik, baina bai legealdian zehar EH Bilduren beharra izateak. Alzórrizek argi utzi du, gobernua eratzeko eta bera sostengatzeko lanean ez dute inondik inola EH Bildurekin hitz egingo: “Guretzat ez dira aurrerakoiak eta kito”.

 

Geroa Baiko Unai Hualdek ere PSNk bileran erakutsitako borondate ona berretsi du. Azaldu duenez, beraiek 2007ko abuztukada mahai gainera atera dute eta PSNko ordezkariek adierazi diete horrelakorik ez dela berriz gertatuko. Geroa Baik gogorarazi die gobernu berriak legealdi osoan egonkortasuna beharko duela eta sozialistek erantzun dute “politika egiteko moldeak aldatu direla” eta 23 parlamentarirekin egin dezaketela aurrera. Hualde Geroa Baiko bigarrena izan da legebiltzarreko zerrendan eta EAJko Napar Buru Batzarreko lehendakaria da.

 

Geroa Baitik Uxue Barkos, Hualde bera, Koldo Martinez, Itziar Gomez eta Zabaltzeneko lehendakari Ana Ansa izan dira. PSNren aldetik Maria Chivite, Alzórriz eta Inma Jurío.

 

Esparza Sanchez sostengatzeko prest

 

Asteazken honetan, halaber, Javier Esparza Espainiako erregearekin bildu da, azken hau Espainiako Kongresuan ordezkaritza lortu duten alderdien ordezkariekin egiten ari den errondan. Esparzak jakinarazi duenez, PSOEk Nafarroan NSk gobernatzea ahalbidetzen badu, NSk sostenga dezake Pedro Sanchez inbestidura saioan.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Udal eta foru hauteskundeak 2019 kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude