ARGIA.eus

2021eko irailaren 24a

Castejongo zentral termikoak zuritzeko saiakera berria salatu du Sustrai Erakuntzak

  • Europako eskakizunei jarraituz, Nafarroako Gobernuak jendaurrean jarri du hiru zentral termikoen Ingurumen Baimen Bateratuaren berrikuspena. Sustrai Erakuntzaren ustez, gobernuak hori baliatu nahi du Castejongo zentral termikoak balioztatu eta martxan mantentzeko.

Xabier Letona Biteri @xletona
2021eko ekainaren 23a
Argazkia: Ekologistak Martxan

Zentral horietan elektrizitatea ekoizten dute gas naturala erreta, eta elkartearen ustez, “zaharkituak daude, gutxi erabiltzen dira eta legez kanpokoak dira”. 2000. urtean hasi ziren eraikitzen, 2002an martxan jarri eta 2007an bukatu zen proiektua. Hala ere, azken hamarkadan ia geldi egon dira, bai 2008tik aurrera elektrizitate kontsumoak izan duen beherakadagatik, bai gero eta energia berriztagarri gehiago ekoizten delako.

2019an gorakada handia izan zuten: dauden hiru zentralak –bi Total-enak dira eta bestea Iberdrolarena– 10.000 ordutik gora aritu ziren jardunean, baina aurreko zazpi urteetan geldirik egon ziren, eta 2020an eta 2021ean, OMIE Elektrizitatearen Merkatu Iberiarreko Operadorearen datuen arabera, ordu gutxi batzuk baino ez dira ibili.

Sustrai Erakuntzak bere webgunean zehazten duen gisan, “Nafarroako Gobernuko Ingurumen Departamentua instalazio horien Ingurumen Baimen Bateratuak berritzeko izapideak egiten ari da gaur egun. Dokumentu horiek instalazio horien funtzionamendu-baldintzak arautzen dituzte. Kanporatu ditzaketen kutsatzaileen kantitateak zehazten dituzte, bai eta ingurumenean eta pertsonen osasunean izan ditzaketen inpaktuekin zerikusia duten beste baldintzatzaile batzuk ere”.

Ingurumen elkarteak susmoa du airera egiten diren isurketak neurtzeko hainbat neurgailu kentzeko saioa egon daitekeela eskakizun berria finkatzean. Salatzen du, halaber, zentralak Castejongo hirigunean daudela, etxebizitzetatik 500 metrora, eta hor jarraituz gero kutsadura akustikoa sortzen jarraituko dutela, “enpresak zeharka aitortzen ari diren bezala”. Enpresek argudiatzen dute lehendik dagoen instalazioa dela eta hori ezin dela aldatu.

Legearen eremuan, Espainiako Auzitegi Gorenak aspaldi eman zien arrazoi Castejongo herritarrei zentralak itxi beharra eskatu dutenean, baina Sustraik salatzen duenez, enpresek eta administrazioak orain arte zirrikituak bilatu dituzte zentralek zabalik jarrai dezaten, eta bere ustez, epai horien exekuzio posible bakarra zentralen desegitea da”.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Castejongo zentral termikoak kanaletik interesatuko zaizu...


Azkenak EGILEA
Argia buletina
Egunaren laburpena
zure e-postan
Eguneraketa berriak daude