Cabacas auzia: Epaiketa azken txanpan sartuta, eta bertsio kontrajarriak bere horretan

  • Urriaren 15ean ekin zitzaion Iñigo Cabacasen heriotzaren gaineko epaiketari, eta azaroaren 9an amaituko da. Orain arteko saioetan kontrajarri egin dira ertzainen gehiengoen eta kaleko testiguen bertsioak. Asteartetik aurrera adituek deklaratuko dute.

Amaia Lekunberri @amaialekunberri
2018ko azaroaren 06a
(Argazkia: Ecuador Etxea)

Iñigo Cabacas Liceranzu Ertzaintzak jaurtitako pilotakada batek hil zuen 2012ko apirilaren 5ean, eta sei urte eta erdiren ostean kasuaren gaineko epaiketa abiatu dute. “Zuhurtziagabekeria larrizko hilketa” delituagatik akusatutako sei ertzainen deklarazioekin eman zitzaion hasiera epaiketaren lehen saioari urriaren 15ean, eta ordutik testigu ugari (Ertzaintzako agenteak, kaleko jendea eta Cabacas artatu zuten osasun arloko langileak, besteak beste) igaro dira Bilboko Justizia Auzitegitik. Epaiketan barne hartuko dituen hamalau saioetan 100 pertsonatik gorak deklaratuko dute guztira, eta azaroaren 6ko asteartetik aurrera adituek hartuko dute hitza.

Epaiketaren herena burutu zenerako, bi bertsio kontrajarri nagusituak ziren auzitegian: lekukoena alde batetik, eta Cabacasen heriotza eragin zuen Ertzaintzaren operatiboan parte hartu zuten auzipetutako agente gehienena beste aldetik. Testigu gisa deklaratutako hainbat hiritarrek emandako bertsioek antzekoa diote: poliziaren oldarraldia justifikatzen zuen gertakaririk ez zela eman, ertzainek abisurik gabe ekin ziotela kargari, aurrez aurre eta jendea “jotzera” tirokatu zutela, Cabacas zauritu ostean jendearen anbulantzia eskakizunei entzungor egin zietela agenteek, eta laguntza eske hurbildutako jendearen kontra indarkeria erabili zela. Auzipetutako ertzainek, aldiz, polizia operatiboa “zuzena eta egokia” izateaz gain, jende andanaren aurrean “kontrola hartzeko modu bakarra” zela adierazi zuten.

Ertzainen gehiengoak emandako bertsio nagusitik aldendu zen Cabacas zauritu zen gau hartako operatiboan ofizial gisa aritutako agente ohia ordea, eta bera plazan sartzearen aldekoa izan ez arren, Deustuko (Bilbo) egoitzan zegoen operazio buru Ugartekoren aginduei jarraitu ziela adierazi zuen. Testigu honen arabera, operatiboan ofizial gisa aritu bazen ere, gertakarien gaineko erantzukizuna bere gainetik zeuden arduradunengan dagoela eman zuen ulertzera. Ertzain ohi honen deklarazioaz geroztik, gertakarien gaineko ardura agente honi leporatzeko estrategia erabili dute gainontzeko polizia agenteek eta Ertzaintzako goi karguek.

Adostutako testigantza

Urriaren 24an burututako epaiketaren seigarren saioan, ertzainen gehiengoak defendatutako bertsioa indartzen zuten adierazpenak egiten zebilen agente baten testigantzak biraketa eman zuen akusazio partikularrak egindako galdera baten aurrean. Testigantza prestatzeko Eusko Jaurlaritzako abokatuekin edo Ertzaintzako nagusiekin bildu ote zen galdetu ziotenean, agenteak baiezkoa erantzun eta amaitutzat eman zuen deklarazioa.

Testigantza hau tartean izan arren, hurrengo saioetan ere hasierako estrategiari eutsi diote auzitegitik igarotako ertzainek, ardura operatiboko ofizialari leporatuz. Horrez gain, agenteen erantzukizuna zehaztea eragozten duen beste estrategia bat ere erabili du akusatutako ertzainen abokatuak. Urriaren 30ean burututako zortzigarren saioan, adibidez, 2012ko apirilaren 5ean furgoneta berean zihoazen hainbat agentek deklaratu zuten, beraiek Cabacasen heriotzarekin zerikusirik ez zeukatela berretsiz. Kasuaren jarraipena egiten ari den Berriako kazetari Gotzon Hermosillak azaldu zuenez, “akusatutako ertzainen abokatuak saiatzen ari dira frogatzen beste furgoneta batzuetako agenteek ere esku hartu zutela Maria Diaz de Haro kale ondoko kalezuloan, horrek zailduko lukeelako haiek defendatzen dituzten ertzainen erantzukizuna zehaztea, baina orain arte ez dute arrakasta handirik izan”.

Eskopeten eta frogen garbiketa

Adituen deklarazioei bidea eman aurretik burututako urriaren 31ko bederatzigarren saioan, lekuko bezala deklaratutako azken ertzainetako batek beste behin eta zuzenean azpimarratu zuen operatiboko ofizialarena zela gertaturikoaren ardura. Lekuko honek tokiko arduraduna zen agenteari oker jokatzea egotzi zion.

Saio berean deklaratu zuen gertakariak eman zirenean Deustuko ertzain etxeko nagusiorde Raul Otaolak ere, zeinak onartu zuen ez zuela operatiboan erabilitako eskopetak ez garbitzeko agindurik eman. Cabacasen zauriak “hain larriak zirenik” ez zekiela adierazi zuen, eta eskopetak ez garbitzea kasua argitzeko lagungarri izan zitekeenik ez zuela pentsatzen gehitu. Horretaz gain, kasuaren gaineko ikerketarik zabaldu ote zen edo ez, “ziur ez zekiela” esan zuen.

Erantzukizunen eskala eta goi karguen zigorgabetasuna

Cabacasen familiak eta Justizia Iñigorentzat plataformak hasieratik salatu dutenez, hilketaren arduradun guztiak ez dira eseriko akusatuen aulkian, Ugarteko goitizenez ezaguna den ertzaina kasu, egun hartako polizia operazioaren kargu zegoena. Ildo horretan, Herrialde Katalanetatik begirale gisa aritzera etorritako Laia Serra abokatuak Ertzaintzaren baitan erantzukizun eskala bat dagoela azpimarratu zuen. Bere adierazpenak jaso ditu Berriak: “Epaiketa hau ezin da bihurtu eskopetari nork sakatu zion argitzeko auzia. Hemen erantzukizun mailakatuak daude, eta polizia nagusiek erantzukizun organikoa dute. Hilgarriak edo kaltegarriak diren ondorioak eragoztea da haien egitekoa. Aldagai honek gure arreta osoa behar du, eta espero dugu epaitegiak ere aintzat hartzea”.

Ertzainen sindikatua den Ernek, bere aldetik, “buruzagitza politiko eta poliziala” jarri du jo-puntuan publiko egindako ohar batean. Sindikatuaren hitzetan “arduradun nagusiak ez dira ia inoiz egoten ekitaldiak koordinatzen” eta hurrengo galdera aireratu du: “Eta orain, nork eseriko ditu aulkian benetako arduradunak?”.

Mobilizazioak

Epaiketa azken txanpan sartu den honetan, Justizia Iñigorentzat plataformak mobilizazio deialdi gehiago egin ditu. Asteazkenean, azaroak 7, elkarretaratzea deitu dute Auzitegi parean, 09:00etan. Eskoziatik etorritako John Finnie begiraleak hitz egingo du bertan. Ostegunean, azaroak 8, manifestazioa egingo dute Indautxuko Kirruli tabernatik Justizia Auzitegiraino, 19:30etan.

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Inigo Cabacas auzia  |  Gomazko pilotak  |  Ertzaintza  |  Bilbo

Inigo Cabacas auzia kanaletik interesatuko zaizu...
2018-11-16 | Amaia Lekunberri
Iņigo Cabacasen senide eta lagunek epaiketan azpijokoa egon dela salatu dute

Iñigo Cabacasen senide eta lagunek epaiketaren balorazioa egin dute ostiralean Bilboko Kafe Antzokian deitutako prentsaurrekoan. Beraien ahotik kontatu nahi izan diote jendarteari gertatutakoa, baita nola sentitzen diren ere.


2018-11-07 | ARGIA
Cabacasen gurasoak fiskalak ertzainen absoluzioa eskatu ostean: "Umiliatu egin gaituzte"

Iñigo Cabacasen heriotza argitzeko epaiketaren azken aurreko egunean, behin betiko ondorioak eta eskaerak aurkeztu dituzte alde guztiek. Hasierako eskaerari eutsi dio fiskalak: ez du deliturik ikusten eta absoluzioa eskatu du akusatuentzat. Minduta, haserre, malko artean atera dira saiotik Fina Lizeranzu eta Manu Cabacas. “Gure semea hilerrian dago eta fiskalak ez du horretan delitu aztarnarik ikusten?”.


2018-10-25 | Iņigo Igartua
Ertzain batek Eusko Jaurlaritzako abokatuekin testigantza prestatu zuela onartu du

Iñigo Cabacasen heriotza eragin zuen gauean polizia operazioan zegoen ertzainetako batek, auzitegian eman beharreko testigantza adosteko Eusko Jaurlaritzako abokatuekin eta Ertzaintzako nagusiekin bildu zela aitortu du.


2018-10-24 | Amaia Lekunberri
Cabacas auzia: saioen herena burututa eta bertsio kontrajarriekin

Iñigo Cabacasen hilketaren gaineko epaiketa martxan da urriaren 15etik. Gaztearen heriotza eragin zuen Ertzaintzaren operatiboan parte hartu zuten auzipetutako agente gehienen testigantzak eta lekukoenak kontrajarri egin dira gaur arteko saioetan.


2018-10-19 | ARGIA
The murder of Iņigo Cabacas: after six years, six Basque policemen on the bench

The trial on the murder of Iñigo Cabacas has started in Bilbao, atthe third Court of Bizkaia. Six Basque policemen will be judged for being in charge of giving orders or for having admitted firing rubber bullets on the day of the murder. Other Basque policemen also shot rubber bullerts, but their identity has just to be disclosed at the trial.


2018-10-17 | ARGIA
Semea hil eta sei urte geroago, barkamena eskatu diete Iņigo Cabacasen gurasoei operatiboko sei ertzainetatik bik

Iñigo Cabacas auziaren barruan epaitzen ari diren sei ertzainetatik bik barkamena eskatu diete hildakoaren gurasoei, astelehenean epaitegiko atean haiekin topo egin zutenean. Fina Liceranzuk, Cabacasen amak, kontatu du gertatutakoa.


Operazio burua: "Istiluen aurkako borrokan eskarmentu gutxiko lan-taldea zen"

Ugarteko-ren aginduetara zegoen ofiziala da operazio burua, eta ez du bere burua gertatutakoaren arduradun nagusitzat jo, gainerako sei akusatuek aurkakoa dioten arren. Ertzain gehienak herri-segurtasun sailekoak izanik, askok ez zekiten pilotak jaurtitzeko eskopeta erabiltzen ezta erabiltzeko neurriak ere. 


2018-10-15 | ARGIA
Sei ertzain aulkian, sei urte ondoren hasi da Iņigo Cabacasen hilketa argitzeko epaiketa

Iñigo Cabacasen hilketari buruzko auzia hasi da astelehen goizean Bilbon, Bizkaiko Auzitegiko 3. Salan. Sei ertzain epaituko dituzte, egun horretan aginte ardurak zituztelako edo gomazko pilotak jaurti zituztela onartu dutelako. Beste ertzain batzuek ere egin zuten tiro, baina auziaren garapenean oraindik ez da lortu jakitea nortzen diren.


"Iņigo Cabacasen heriotzagatik zigorrik ez badago inpunitatea aterako da garaile"

Amaia Liceranzu eta Oier Amorrortu Iñigo Cabacasen izekoa eta lehengusua dira. Urriaren 15ean hasiko den epaiketa gertutik biziko dute eta orain arte gertatutakoari buruz mintzatu dira. Halaber, urriaren 14an egingo duten gaubelan parte hartzeko deialdia zabaldu dute.


2018-10-12 | ARGIA
Iņigo Cabacasen hilketaren gaineko epaiketa astelehenean hasiko da

Ertzaintzaren pilotakadaz hil zen Iñigo Cabacas 2012ko apirilaren 5ean. Sei urte eta erdiren ostean, epaiketari bide emango zaio.


Azkenak
EGILEA
Eguneraketa berriak daude