Berriz negoziatzeko ordua iritsi da. Ordezkaritza sindikalaren gehiengoa duen ELA sindikatua sei aldiz eseri da negoziazio mahaian, azken aldiz maiatzaren 17an. Sindikatuak enplegua defendatu nahi du, eta harago, egoitzetako zerbitzuok publifikatu eta oro har zaintza eredua errotik aldatu nahi du. Langileek mobilizaziok iragarri dituzte, negoziazio mahaiek ez dutelako aurrera egiten eta sindikatuak adierazi duenez, hitzarmenaren edukietan murrizketak proposatu dituztelako eta langileen kaleratzeak egingo dituztela mehatxu egin dutelako. Lehenengo protesta ekainaren 25ean egin zuten Bizkaiko Foru Aldundiaren aurrean. Sindikatuak dio Bizkaiko Foru Aldundia dela zerbitzuaren ardura duena eta haren jarrera kritikatu du: “Negoziazioek aurrera egiten ez dutela ikusita kezkatuta egon beharrean eta ardura agertu beharrean okultismora ari dira jolasean eta lehentasun ‘soziala’ eman diote Guggenheim berri batean inbertitzeari”.

378 eguneko greba

Azken hitzarmena sinatzeko 378 greba egun egin behar izan zituzten Bizkaiko egoitzetako langileek, ia erabat emakumeak. Borroka laboral eta feminista oso indartsua izan zen, batez ere Bilboko kaleetan eta Bizkaiko herrietan oihartzuna izan zuena. Emakume langileen borroka eta zaintzaren gaia agenda mediatikoaren erdigunera ekartzea lortu zuen greba hark. Greba gidatu zuen ELA sindikatuaren Manu Robles Arangiz Institutuak eta ARGIAk elkarlanean argitaratu zuten 2019an borroka luze haren kontakizuna Berdea da more berria liburuan.