Egun bererako deialdia egin dute, nahiz eta bakoitzak bere aldetik egingo dituen protesta bilkurak.

Sektorean gehiengoa duen sindikatuak, ELAk, lehenik eta behin, Eusko Jaurlaritzari eskatu dio errespetatzeko langileek grebarako duten eskubidea eta ez ditzala %100eko gutxieneko zerbitzuak dekretatu, Gipuzkoako zahar egoitzetako greban egiten duen bezala.

Negoziazio mahaietan ez dutela aurrera egin dio sindikatuak, eta bai patronalek eta bai Foru Aldundiak ondoko egoerak onartzen jarraitzen dutela: soldatak izoztea, lanaldi partzialak eta langileak lehen egunetik ez ordezkatzea. Ondorioz, langileen lan baldintzak prekarizatu eta egoiliarren zerbitzua kalitatez kaskartzen dela diote.

Gogorarazi du Foru Aldundik 255 milioi euroko partida onartu duela 2021-2023 aldian oheak ituntzeko. Sektoreko patronalek diru hori jasoko dutela eta langileen lan baldintzetan eta zerbitzuaren hobekuntzan ez dela inbertituko kritikatu du.

Patronalei eta Foru Aldundiari dei egin die langileen lan baldintzak hobetzeko eta langile kopurua handitzeko.

LABek lan baldintzak langile publikoenekin parekatzea eskatu du

LABen ustez, zaintza negozio bihurtu da eta enpresek dirua irabazten dute erabiltzaile plaza berri bakoitzeko. Foru Aldundia, berriz, egoera horren arduradun egin du.

Abenduaren 14rako grebari begira bi aldarrikapen egin dituzte. Batetik, langileen lan baldintzak langile publikoenekin parekatzea. Sindikatuaren ustez, oraingoak parekatzearen negoziazioa izan behar du. Bestetik, ratio gizatiarragoak eskatu ditu. Langileek adierazi dute ez direla robotak, pertsonak baizik eta ezin iritsiaren ondorioz adinekoen duintasunari eraso egiten zaiola. Alegia, langile gehiago behar direla aldarrikatu dute.

Sindikatuaren iritziz, gatazkaren azken irtenbidea adinekoak zaintzeko zerbitzua publifikatzea da. Foru Aldundiak pribatizazioa inposatzen duela dio eta egoitzetan bizitzen ari direnaren erantzule dela erakunde publikoa.

Aurreko hitzarmena lortzeko 378 eguneko greba

Azken hitzarmena sinatzeko 378 greba egun egin behar izan zituzten Bizkaiko egoitzetako langileek, ia erabat emakumeak. Borroka laboral eta feminista oso indartsua izan zen, batez ere Bilboko kaleetan eta Bizkaiko herrietan oihartzuna izan zuena. Emakume langileen borroka eta zaintzaren gaia agenda mediatikoaren erdigunera ekartzea lortu zuen greba hark. Greba gidatu zuen ELA sindikatuaren Manu Robles Arangiz Institutuak eta ARGIAk elkarlanean argitaratu zuten 2019an borroka luze haren kontakizuna Berdea da more berria liburuan.