LAB, ELA eta ESK sindikatuen babesarekin, Bizkaiko Simply-ko langileak kalera atera dira asteazkenean, eta berdin egingo dute ostiralean. Asteazkeneko manifestazioa Bilboko Zabalburu plazatik irten da ehunka lagunez osatua. Egun osoko lan-uzteak iragarri dituzte. Supermerkatuaren enpresaburuek “beste aldera” begiratzen dutela diote langileek, azken hauen eskariei kasurik egin gabe.

Langile gutxiegi daudela medio, lan-erritmoa “jasanezina” egiten zaiela adierazi dute. Are gehiago, atsedena ez dela nahikoa diote. Horrek guztiak osasuna galtzea eta lana eta bizitza uztartzeko “zailtasunak” sortzea ekarri diela aldarrikatu dute.

Urteak daramatzate inbertsioak eskatzen, lan egiteko baliabideak ez direlako nahikoak. Gainera, garbitzaileez ere mintzatu dira: “Hauen lanak desagerrarazi dituzte eta orain guk arduratu behar dugu garbiketaz, gainerako sailetan langile gutxiago geratuz”. Hori guztia dela-eta, salaketa ozen egin dute: “Nazkatuta gaude presioaz, lan-erritmo jasanezinez eta mehatxuez”.