ARGIA.eus

Itzulpen automatikoa / Machine translation

Bizitzen jarraitzeko laguntza

  • Gaur egun, hogei pertsona daude harreran Tolosako Zuloaga Txiki aterpetxean; arreta, orientazioa eta laguntza eskaintzen diete bestelako baliabiderik ez duten migratzaile, errefuxiatu eta aberrigabeei. Abuztuan bi urte egingo ditu zentroak zabalik.

Sidi Ethman Sidi Dghaoui, Alpha Mamdou Diallo eta Ziko Likofo. I. SAIZAR

2021eko abuztuaren 03an - 07:25
Azken eguneraketa: 09:41

Gaur da Nazioarteko Errefuxiatuen Eguna. Munduan geroz eta pertsona gehiago daude beren jatorrizko herrialdetik ihes egitera behartuta. Beren bizitza arriskuan dute, arrazagatik, erlijioagatik, nazionalitateagatik, gizarte-talde jakin batekoa izateagatik edo iritzi politikoengatik jazarriak izan daitezkeelako. Eta bada eskualdean horrelakorik. Besteak beste, Tolosako Zuloaga Txiki aterpetxea dago prestatuta harreran nazioarteko babesa eskatu dutenak eta egoera bereziki ahulean dauden migratzaileak hartzeko, eta gaur egun, hogei pertsona daude bertan.

Eguneko zereginez gain, lasai  egoteko momentuak ere aurkitzen  dituzte harreran dauden pertsonek. Argazkian, Sidi Ethman Sidi Dghaoui eta Ziko Likofo. I. SAIZAR
Eguneko zereginez gain, lasai  egoteko momentuak ere aurkitzen  dituzte harreran dauden pertsonek. Argazkian, Sidi Ethman Sidi Dghaoui eta Ziko Likofo. I. SAIZAR

Erromesen etxea izatetik, harrera zentroa izatera pasa da Zuloaga Txiki. 2019ko abuztu amaieran zabaldu zituen bere ateak, eta guztira 35 pertsonei arreta emateko gaitasuna du. Tolosako Udalak CEAR-Euskadiri egindako lagapena izan da, azken honek kudeatu dezan. 2020an, 68 pertsonei eman zitzaien arreta, eta 2021ak orain arte eman duen honetan, 38 pertsona hartu dituzte. Zabaldu zenetik, guztira, 22 nazionalitatetako 112 pertsonek erabili dute baliabide hori.

Erromesen etxea izatetik, harrera zentroa izatera pasa da Zuloaga Txiki; 2019ko abuztuan zabaldu zituen bere ateak

Harrera zentroak atsedenerako, babeserako eta berrosatzeko leku bat eskaintzen duela azaldu du Arantza Chacon Zuloaga Txikiko zuzendariak. Horrez gain, ordea, nazioarteko babesa eskatzeko beharrezkoa den laguntza juridikoa eskaintzen dute, eta osasun eta formaziorako eskubideak ere eskuratzen laguntzen dute. «Bizikidetza zubiak eraikitzen saiatzen gara, Euskal Herrian sortu nahi dugun gizarte eredua moldatzeko».

Asteartean, Beatriz Artolazabal Berdintasun, Justizia eta Gizarte Politiketarako sailburuaren bisita izan zuten Zuloaga Txikin. Xabier Legarreta bere saileko Migrazio eta Asiloko zuzendaria, Olatz Peon Tolosako alkatea eta Patricia Barcena CEAR-Euskadiko zuzendaria ere bertan izan ziren. Adierazpenak egin ostean, instalazioak ikusteko bisita egin zuten. I. SAIZAR

Zuloaga Txiki aterpetxeak bi eraikin ditu: batean, jangela, sukaldea eta erabilera anitzeko solairu bat dute, tailer ezberdinak egin ahal izateko. Areto horretan dituzte arropa garbitzeko garbigailuak ere. Beste eraikinean, aterpetxea dute, logela eta komunekin. 6-12 pertsonentzako logela partekatuak ditu, eta goiko solairuan, ganbaran, lanerako bulegoaz gain, mahai jolasak, telebista, ordenagailuak eta beste dituzte, «egoteko leku bat da».

Lotarako prestatuta dagoen eraikin horretan, beheko solairua egokituta dago mugikortasun arazoak dituzten pertsonentzat. Eta gehienetan, familiak ere bertan kokatzen dituzte. Une honetan, batetik, bikote bat dago urte eta erdiko haur batekin, eta bestetik, aniztasun funtzionala duen mutil bat dago, gurpildun aulkian ibiltzen dena. Pandemia dela-eta, bakartuta egon behar izaten dutenentzat ere beheko solairua baliatzen dutela azaldu du zuzendariak.

Gainerakoan, logelak unean-unean iristen diren pertsonen profil motaren arabera banatzen dituzte. «Migrazio fluxuak aldatuz doaz, eta pandemiak berak profilak aldatu egin ditu azken aldian: familia gutxiago iristen ari dira gaur egun eta bakarrik datozen emakumeak ere gutxiago dira». Espazioak ere baldintzatzen diela azaldu du Chaconek: «Gelak handiak eta partekatuak dira, eta estatistikoki gizon gehiago etortzen direnez, errazagoa izaten da gizonezkoen gela osatzea; eta behin gizon bat gela batera bideratzen badugu, gela gizonekin betetzen dugu eta alderantziz».

Bakoitza lantzen

«Pertsona bakoitza mundu bat da», dio Zuloaga Txikiko zuzendariak. Bakoitzaren errealitateari arreta pixka bat eskaintzen saiatzen dira: «Pertsona hauek daukaten egoera administratiboak asko baldintzatzen ditu, baina norberaren kezkei, gogoetei eta bestelako egoerei kasu egiten saiatzen gara». Errefuxiatuak Zuloaga Txikira iristen direnean, ezagutu eta seguru sentiaraztea bilatzen dute. «Pertsona asko motxila pisutsu batekin iristen dira, eta segurtasun falta eta mesfidantza handiarekin», kontatu du. «Erakutsi nahi izaten diegu laguntzeko prest gaudela, eta inguruan ere, zentroan bertan, laguntzeko gaudela».

Lehen etapa igarotzen dute Zuloaga Txikin, asiloa eskatuta edota eskatzear daudenak dira asko

Elkarbizitzarako espazioak sortzen dituzte, «bizikidetza dago Zuloaga Txikiren oinarrian». Zentrora iristen diren momentutik argi uzten diete Zuloaga Txiki denen artean eraikitzen duten zerbait dela. Esaterako, txandak egiten dituzte otorduak egiteko eta bakoitzak, gainerakoan, bere egunerokoa du: jaiki, gosaldu, klasera joan, bazkaldu, kirola edo gustuko ekintzaren bat egin, afaldu eta ohera.

Tolosako Udalak CEAR-Euskadiri utzi dizkio bi eraikinak harrera zentro bezala funtzionatu dezan. I. SAIZAR

Aldian-aldian, jarduera bateratuak ere egiten dituztela kontatu du Chaconek; esaterako, orain oilategirik ez duten arren, guztien artean zaindu izan dute, edota instalazioetan konponketaren bat egin behar izaten denetan, denen artean egiten dute.

Ohikoena da zentroan dauden pertsonak astegunetan ikastera joatea. Gehienek gaztelania klaseak jasotzen dituzte EPAn, baina hizkuntzaz gain, bestelako formazioak ere egiten dituzte Tolosako ikastetxean.

Aldi baterako bizilekua

Zuloaga Txikira aldi baterako etortzen dira migratzaile, errefuxiatu eta aberrigabeak. Egonaldiaren bataz bestekoa lau hilabete inguru izan ohi direla zehaztu du zuzendariak, baina badira bi aste eginda joaten direnak edota zortzi hilabete pasatzen dituztenak ere. «Egoera administratiboaren edo asilo espedientearen egoeraren menpe dago guztia», azaldu du.

Oro har, iritsi berritan, lehen etapa igarotzen dute Zuloaga Txikin, asiloa eskatuta edota eskatzear daudenak dira asko, baina asiloa ukatu dietenak eta egoera zaurgarrian daudenak ere hartzen dituzte harreran. «Asilo eskaera, esaterako, kontu oso luzea da, batzuk txartel gorria eta lan baimena ere lortzen dituzte lan merkatuan sartzeko, baina ez dute guztiek lortzen».

Euskal Herrira iristean, CEAR-Euskadik EAEko hiru hiriburutan ditu egoitzak, eta horietara bideratzen dira. Gizarte langileek kasuak aztertu eta bakoitza bere lekura bideratzen dute: «Egindako azterketaren arabera, gure zentroetako batean sartzeko aukera ematen zaie, eta profilaren, erabilgarritasunaren eta plaza hutsen arabera erabakitzen dugu non egongo den aurrerantzean». Azterketa horretan, guztia hartzen dute kontuan, aurrez non egon den, senideren bat gertu baduen edota pertsona horren benetako errealitatea zein den.

Tutoretzapeko pisuak

Zuloaga Txikiren ardura CEAR-Euskadik eramaten duen moduan, Tolosan aurkitzen diren tutoretzapeko pisuak CEAR erakundeak eramaten ditu. «Bi erakunde ezberdin, baina elkarren osagarri gara», azaldu du Chaconek. Kasu honetan, CEARek Espainiako ministerioaren harrera programa jarraitzen du. Tolosan, guztira, hiru etxebizitza dituzte eta 14 errefuxiaturentzat lekua dute. EAEn, zehazki, tutoretzapeko pisuetan 198 plaza dituzte. Etxebizitza horiek ere, «nazioarteko babesaren eskatzaileen profiletara eta beharretara» egokitzen dituzte.


Kanal honetatik interesatuko zaizu: Migrazioa
Materialismo histerikoa
Atzerritar

Eta mugak igarota ere zer, muga azalean geratzen da, eta betirako, etengabe, da atzerritar barruan muga daramana, hain atzerritar, ezen ez duen guztiz pertsona ematen. Ezen hori baino ez dugun ikusten, hemengoa izanik ere bai, askotan, ijitoa bada, adibidez, atzerritarra... [+]


Lotsaren ituna

Duela aste batzuk Bartzelonan batu ginen Mugak Zabalduz karabanaren aurtengo ibilbidea eta helburua zehazteko asmoz. Uztailean Trieste eta Balkanetako mugara joango gara, berriro ere (bederatzigarren edizioa da) Europak sustatzen duen migrazio-politikak sufrimendua eta heriotza... [+]


Frontexek bazekien ‘Adriana’ ontziko migratzaileak arrisku larrian zeudela, baina ez zuen ezer egin

Greziako kostaldean joan den urteko ekainean 720 migratzaile zeramatzala hondoratutako itsasontziaren kasuari buruzko ikerketa publiko egin du Europako Herritarren Defendatzaileak. Azaldu duenez, Frontex erakundeak ez du nahikoa tresnarik halako kasuetan erabakiak hartzeko... [+]


2024-02-29 | Euskal Irratiak
Otsailean 600 migratzaile lagundu ditu Irungo Harrera Sareak

Migratzaileen kopurua anitz emendatu da Irun eta Hendaia arteko pasabidean. Irungo Harrera Sareak ohartarazi duenez, otsailean 600 pertsona lagundu dituzte, iaz, urte osoan 2.700 izan zirelarik. Iragan urtarrilean, 2.700 etorkin heldu dira Kanariar Uharteetara, egunero 80... [+]


2024-02-26 | Garazi Zabaleta
Agharas elkartea
Kulturarteko ortua, Barakaldoko Gurutzeta auzoan

Amazigh gazteek sortutako elkartea da Agharas, eta urteak daramatza kulturartekotasuna lantzen Barakaldo inguruan. Duela lau bat urtetik, kalean bizi diren gazteei astean hirutan afariak ematen dizkiete, eta harrera pisu bat ere badute martxan, aldi baterako erabiltzeko... [+]


Eguneraketa berriak daude