Eusko Jaurlaritzaren Segurtasun Sailak eman du bi istripuen berri. Goizean jazo zen lehena, Zestoan, Aizarnako pinudi batean. Basogintza sektoreko langileari zuhaitza erori zitzaion gainera. 50 urteko gizonezkoa da zendutakoa, eta Haitz Beltz enpresarentzat lan egiten zuen.

Bigarren istripua Zarautzen gertatu zen, arratsaldez. Añorbe auzoan eraikuntza lanetan ari zen langile bat garabitik erori zen, 30 metroko altueratik. Ostean garabia ere erori zen, bigarren langile bat zaurituz. Zendutakoa 32 urteko zumarragarra da, eta Gruas Pingon enpresarentzako egiten zuen lan.

LAB sindikatuaren kontaketaren arabera, urtea hasi zenetik hemezortzi langile hil dira lan istripuz Euskal Herrian.