Bizkaiko zahar egoitzetan bi asteko grebara deitu du ELAk

  • ELA sindikatuak Bizkaiko adinekoen egoitzetako langileak deitu ditu bi asteko greba egitera, irailaren 21etik hasita. Ez da izango aurten sektorean egiten den lehenengo lanuztea –hamazortzi greba egun zituzten martxoan eta ekainean–, baina bai luzeena. Bizkaiko Aldundiari eta egoitzetako patronalei “akordioak lortzeko borondaterik ez izatea” leporatu diete.


2016ko irailaren 06an - 15:59
Maiatzean egindako sektoreko mobilizazio bat. (Argazkia: ELA)

“Sektoreko hiru patronalek (GESCA, LARES, ENBE) ez dituzte kontuan hartzen langileen eskariak, eta horiek gero eta baldintza prekarioagoetan eutsi behar diote zerbitzuaren kalitateari”, kexatu da sindikatua. Asteko 35 orduko lanaldia, soldata igoera duina, baja-egoerak hobetzea eta gehiegizko lanaren arazo “larriari” konponbidea ematea eskatuko dute, besteak beste. Ez dute baztertu grebaren iraupena luzatzea, bi asteotan akordiorik lortzen ez badute.

Bizkaiko Foru Aldundiaren eta patronalen jokabidea gaitzetsi du ELAk: “[Lan baldintzez baino] Patronalak gehiago arduratzen dira plaza bakoitzeko plaza igotzeaz; Aldundiak laster berraztertuko ditu preziook, eta norgehiagoka ari dira ea hiruretatik zeinek handitzen duen plaza kopurua; alegia, Aldundiak diruz lagundutako plaza kopurua”.

Zenbait egoitzatan gutxieneko zerbitzuak bete gabe uztea eta greba egiten dutenak mehatxatzea leporatu die sindikatuak patronalei. Kasu batean langile bi kaleratu dituztela salatu du, gainera.

Bestalde, Aldundiaren ardura aipatu dute, “hura baita egoitza guztietan zerbitzu unibertsala eta kalitatezkoa, eta sektoreko langileen baldintzak arautzen dituen hitzarmena benetan betetzen dela bermatu behar duena.”


Kanal honetatik interesatuko zaizu: Bizkaiko zahar egoitzetako gatazka
2023-10-06 | ARGIA
Bizkaiko zahar egoitzetako langileek 340 euroko soldata igoera lortu dute

Ia bi urtez 68 greba egun egin dituzte Bizkaiko zahar egoitzetako gerokultoreek. ELA eta UGT sindikatuek hitzarmena sinatu dute. 2025ean 1.800 euroko soldata jaso ahal izango dute langileek. Gerokultoreena sektore feminizatu eta prekarizatua da. Bizkaiko langileek 2016 eta 2018... [+]


Berriz ere grebara deitu dute Bizkaiko zahar etxeetako langileek, martxoaren 15etik 24ra

Bizkaiko erresidentzietako ELAko langileek salatu dute patronalak eta Bizkaiko Foru Aldundiak "bere horretan" jarraitzen dutela. "Zaintzarekin negozioa" egiten ari direla salatu du sindikatuak.


Grebaren azken egunean, Bizkaiko erresidentzietako langileek ez dute baztertzen lanuzte gehiago egitea

Otsailaren 1ean zortzi eguneko greba abiatu zuten Bizkaiko erresidentzietako eta eguneko zentroetako langileek. Lan baldintzen hobetzea eta zentroetan eskaintzen den arreta ereduaren errotiko aldaketa exijitzen ari dira. Asteazkena dute azken greba eguna, baina ez dute... [+]


2021-12-13 | ARGIA
Bizkaiko zahar egoitzetako langileek greba egingo dute lan baldintza hobeagoen alde abenduaren 14an

LAB eta ELAk greba deialdia egin dute abenduaren 14rako eta Bizkaiko zahar egoitzetako 5.000 langile deitu dituzte. Ez dute hitzarmenik adostu urtebete luzeko negoziazio mahaietan.


Eguneraketa berriak daude