Duela urte eta erdi hasi zen Vázquez gaizki sentitzen, birritan larrialditan bukatzeraino, baina pilula pila bat errezetatzetik harago, medikuek ez zioten garrantzirik eman Vázquezen min eta sintomei. Azkenean, gastroskopia egiteko hitzordua lortu zuen, baina alarma egoera izendatu zuten agintariek eta ekainera atzeratu zioten. Gastroskopian tumoreak aurkitu zizkioten eta hala kontatu du El Confidencial-en.

Hortik aurrerakoak ere ez dira errazak izan kazetariarentzat, pandemia garaian paziente izatea ez baita erraza: lehenengo kimioterapia saioari, adibidez, bakarrik egin behar izan zion aurre. Argazkien bidez ari da gaixotasuna dokumentatzen, “bai gaitza ikusarazteko, bai nire gorputza onartu eta egoerari beste era batera aurre egiteko”.

Orain aurrera egitea dagokiola dioen arren, ezin du burutik kendu gaixotasunak lasai asko egin zuela aurrera bere gorputz barnean, hitzordu hori atzeratu ziotelako: “COVIDak kutsatu dituenak baino biktima gehiago uzten ari da krisi hau, eta horregatik erabaki dut kontatzea”.